Kyndit ki Nongñiah Auto, ba bat Baibl u dkhot jong ki

Shillong, 16 Nohprah:
Ki nongñiah Auto Rickshaw bad ki trai Auto kiba kamai Motphran kiba don hapoh ka lama jong ka Motphran Auto Rickshaw Owner and Driver Association (MARODA) ki la rakhe pynkhreh Krismas mynta ka sngi balang ha Community hall kaba don ha Mawlai Phudmuri ha ka jingdon ryngkat jong u nongmih khmat ka Mawlai, u Bah Embhahlang Syiemlieh ryngkat bad u Acting Rangbah Shnong ka Mawlai Phudmuri, u Bah Silverstar Kurbah ba ju khot ieit u Bah Best.Kumba ju long manla u snem ki nongñiah Auto na Mawlai sha Motphran ki ju pynlong ia ka jingiaid Kristmas Karol hynrei mynta ki la shim ba katei ka jingiaid Karol ka dei tang ka kam lut phut ban pynlut kai ia ka pisa bad mynta ki la jied ba kaba bha eh ia ki ka dei ban leit noh synniang sha ki briew kiba donkam jingiarap kum ka jaka ri khunswet.
Kaba kham phyllai ha katei ka sngi ka long ba uwei na ki nongniah Auto u bah Cyros Diengdoh, Finance Secretary, uba ki para nongniah Auto kim shym la mutdur eiei ruh u la bat ia ka Baibul ha kti ban ia syllok shaphang ka jingkha ia u Jisu Krist ha Shyngoid bad u la pyniasyriem ia kane ka shyngoid kaba sma iwtung, kaba jaboh kaba la kha ia u Jisu ba ka long long thik kum ka dohnud u briew, kaba jaboh bad ba sma iwtung, hynrei ha kum kane ka jaka u Jisu u kwah ban shong ban sah bad ha kum kane ka jaka la kha ia u. Ban pyniphuh iphieng ia kane ka sngi kane ka seng ka la wanrah da ki nongrwai kiba la rwai ha kane ka janmiet ba kynthup ia ka samla Banrihun Kshiar bad u samla B.Nongrum bad ki paralok kiba la ai ia ki jingrwai basngewtynnat jong ki. Ha shuwa jong kane ka jingrakhe ka seng ka ladep wan pynlong jingiaseng ha ka jaka ri khunswet kaba don ha Pata, ka dong kaba hap ha Mawlai Mawdatbaki, ha kaba ki la nohsynniang ruh sha kine ki khunswet. Haba ai jingkren kum u kongsan u MLA ka Mawlai u la iaroh ia kane ka sienjam bathymmai ba ka seng ka la shim ha jaka ban kan iaid ka carol ka la pynlong da ka jingnohsynniang bad ban ai mynsiem ia ki nongniah auto, u la iathuh khana shaphang uwei u nongniah auto na Tamil nadu, ba kumno tang da ka 80 tyngka ba u ju kamai man ka sngi, u la lah ban pynheh pynsan ia ki khun, haduh ba kawei ka khun kynthei ka la lah ban pyndep ia ka IAS bad long ka ophisar heh.