Nongpoh: Ka la pynkyndit ia ka shnong Umsawkhwan, haba 9 ngut ki bar jylla kiba dei na ka jylla Bihar, ki la ioh ban rung shapoh ka shnong Umsawkhwan ha Ri Bhoi myn ha ka 20 tarik mynta u Bnai, la wan shaw noh da ki briew ka sorkar mynta ka janmiet na kawei ka Dong kaba hap hapoh ka shnong Umsawkhwan.
Haba iakren bad u rangbah shnong ka Umsawkhwan, u la ong ba kitei ki 9 ngut ki briew ki dei na ka jylla Bihar bad kiba la sah kum ki nongshongwai hapoh katei ka shnong ha kine ki snem kiba la leit, hynrei ha kine ki bnai kiba la dep kata shwa ka Lockdown ki la leit sha Bihar, pynban ki la wanphai sha ka Meghalaya bad ha katei ka jingwan phai ka jong ki, ki khlem pyntip satia sha ki bor shnong ka Umsawkhwan.
Utei u nongialam ka shnong Umsawkhwan, u la ong ba ki bor shnong ki tip tad haduh ka 22 tarik mynta u Bnai, kata hadien ba la pyntip da kito kiba iashong iasah marjan halor katei ka jingwan ki briew na ka jylla Bihar bad tang shu tip halor katei ka jingdon kiba wan thymmai, ka shnong ka la leit ban kren sha kitei ki 9 ngut, da kaba kyntu ia ki ba ki dei ban leh ia kaba la bthah ka sorkar, hynrei ka shnong ka la lap ba katei ka jaka sah ka jong ki ka dei kaba kham long khapngiah bad kaba don shibun ki jingduna, naduh ka um bad ruh wat ki jaka leit shabar, kaba la pynlong ia ka shnong bad ki paidbah ba kin syier mynsiem.
“Halor katei ka jingwan kitei ki 9 ngut ki briew na Bihar, kum u nongialam shnong nga la phun sha ki briew sorkar, la phun ruh ia u number 108, na ka bynta ban pan jingiarap bad ruh ba ka shnong ka sngewdonkam ia ki ba ki dei ban shong shwa ha ki Quarantine Centre ka sorkar, hynrei la ioh jubab ba ki jaka sah kaba la buh da ka sorkar ki khapngiah palat, hynrei dei tad hynne ka janmiet la wan shaw noh ia ki, kata hadien 5 sngi ba ki la sah hapoh ka shnong Umsawkhwan” ong U Rangbah Shnong.
Kane ka dei ka kabu ksiar ban rat bad ban ym ailad ia u bar jylla ban wan knieh ia ka ja kpoh jong ngi u khun khasi khara. Nga sngew ban buh ka wei ka jing kyrpad ia kito ki ba wanrah nongbylla na shabar jong ka jylla ban iarap ia ki paradoh parasnam la jong da ka ba ai kam ai jam ia ki, sa ka wei ia ki sengbhalang kiba la trei tyngeh na ka bynta ka jait bynriew hynniewtrep hyniewskum ba iakane ka kabu wat pynlehnohei kumjuh ruh bad ka ba kongsan tam kum ki RANGBAH DONG KI RANGBAH SHNONG ban iatrei lang ryngkat ryngkat bad ki seng ki ba ieng ha la ka tynrai ban ri ban iada ia ka jait bynriew jong ngi. Balei nga ong kumta namar lada ngim lah ban teh lakam ia u nongwei shi sngi ha kane ka lockdown ban wan rung ha ka jylla jong ngi kynmaw ngin ym ioh shuh sa kawei ka lad . Ieid bad Pynim la ka jait bynriew