Kyndit ka Mawlai Presbyterian HS, ba leit poi ka nonghikai Mathematics

Shillong, 3 Nailar:
Ka dei ka jingjia, kaba pynkyndit bad kaba pynlyngngoh ia ki nong-hikai jong ka Mawlai Presbyterian High School, haba kawei ka briew, kaba kyrteng ka Pooja K Ram, kaba na Umpling, ka la leit hynnin ka sngi, ban leit sdang noh ia ka kam hikai jongka, kum ka nonghikai jingkhein ha katei ka skul.
La iathuh ba ka ka Pooja K Ram, ka la ioh ia ka shithi thungkam, ha U Jymmang 2016, ha kaba la bthah ia ka, ba kan sdang trei ia katei ka kam jongka, ha ka 2tarik Nailar 2016. Ka iathuh ba ka ioh ia katei ka shithi thung kam, kum ka Assistant Math Teacher ha Mawlai Presbyterian HS School, ha kaba la soi da U Principal jong katei ka skul,wat la katei ka kam, kam ju don satia ha katei ka skul.
Kaba pyn lyngngoh, ka long ruh ba ka don ka letter head jong katei ka skul, ha kaba la thoh Mawlai Presbyterian H.S. School, Undertaking Meghalaya Government Shillong- 04, Meghalaya, ha kaba ka don ruh ka muhor jong katei ka skul, wat la katei ka jingthoh, ka dei kaba bakla bad kaba shu thaw thok. Ka Pooja, ka iathuh ba u don uwei u briew, uba kyrteng, U Chandan Gard, uba kam ialade, ba u dei U Pastor, uba na Guwahati, ula ai ia ka, ia katei ka kot thungkam, ha kaba ka tulop, ka long T.35hajar shibnai lem bad ka jaka sah ha katei ka skul.
Hynrei, kaba pynlyngngoh, ka long, ba haba ka leit sha katei ka skul, hynnin ka sngi, ka lap pynban, ba ka la shah thok. Haba ki bor pyniaid ia katei ka skul, ki la pyrshang ban phone ia U Chandan Gard, ki lap ba ka mobile jongu, ka lip.
Haba la iakren bad ki nonghikai jong katei ka skul, ki iathuh ba ha katei ka shithi thungkam, ka don ka muhor pyllun, ka letter head jong ka skul bad ka jingsoi kyrteng jong U Principal jong katei ka skul. Uwei na ki nonghikai, uba iakren bad U Rupang, u iathuh ba, ki para nonghikai, ki la ia bakla mynhynnin, ba ki khlem bat ia katei ka briew bad ba kim shym la shim ruh ia ka number mobile jongka bad ki la pyllait ba kan leit phai noh. La iathuh ba katei ka nonghikai, ka la khreh ban sdang noh ia ka kam jongka hynnin ka sngi hi, ha ryngkat bad ka shithi, kaba kan sdang trei noh ia katei ka kam, ong ka khubor.
Ki bor pyniaid skul, ki la ai ia ka jing ujor mynta ka sngi sha ki pulit jong ka Mawlai bad la sngewthuh, ba ki la sdang lap ksai, ia kiba bun kitei ki kam thok, kiba don ha ki bun jaka jong ka nongbah Shillong, ong ka khubor.