Shillong: Ka Langrin Youth Welfare Association (LYWA) ka pynpaw ia ka jingsngewkyndit thret la kum ba iuh tdong bsein hadien ba ka la iohi ia ka jingkhot kyrkieh ia ka jingialang ka ba la long ha ka shnong Wahkaji, South West Khasi Hill District ha ka 3 tarik u Naiwieng 2020, da ka Meghalaya Legislative Assembly Committee on Environment, da ka ba kynthup tang ia ki katto katne ngut ki nongialam shnong, sengbhalang, hima bad ka jingkhot jong ka tei ka Committee ka dei tang ka jingpyndep rukom na ka liang ka Sorkar.
La ong shuh shuh ba bun na ki nongshah khot ha katei ka jingialang ki dei ki ba ju kyrshan ia ka jingkhlong ia u Uranium bad ki ba ju pynpaw ia ka jingkyrshan iaka Surok Two Lane ha ki snem ba la leit. Ka jingkhot tang ia ki nongialam jong ki 8 tylli ki shnong ki ba don ha kitei ki thain katba bun na ki shnong ki khlem shah khot satia, ka jingwan ialam ia ki briew jong ka AMD sha katei ka jingialang bad ka jingkhot hak dak ia ki nongialam ka shnong Domiasiat, ka pyni shai ia ka buitpoh bad buit sianti jong ka Sorkar kum kato ka pharshi ba pdiang ha ba shai hynrei dung pat na rieh tang ban ioh thaw ki lad ki lynti ban ioh khlong ia utei u marpoh khyndew.
Ka LYWA ka maham jur ia baroh ki lymbit bad ki suri kupsnieh langbrot ki ba mut ban shu pynbiej bad leh jemnud ha khmat ki paidbah ha kane ka por ba suk ba sain ka pyrthei, ka LYWA ryngkat bad ki paidbah nongshnong jong kane ka dong bad ka thain kam lah ban pdiang da lei lei ruh em ia kino kino ki stad wad bniah ki ba don liang bad ka Sorkar lane ia kino kino ki jaka pule wad bniah ba thmu ban wan mushlia donbor.
“Ka LYWA kan kyndat sha rud ia kano kano ka kaiphod arsap ka ban ai da katei ka committee sha ka Sorkar namar kiba don bynta lang ha katei ka committee ba bun ki dei kiba kwah dik dik ban khlong Uranium, Horkit Hordang ka kyrwoh kaba shai ka LYWA ka maham jur ia kino kino ki briew jong ka AMD,UCIL bad ki briew ba kyrshan ban khlong ia u Uranium ba kim dei shuh ban wan iuh kjat ha ka dong ka thain ka jong ngi na ka bynta ka jingmyntoi shimet jong ki lane ba kin shu pynhun ia kita ki kynrem ki lyndan jong ki namar ngim kwah ba ka jaidbynriew jong ngi kan shah bamduh. Hynrei ngi kloi ban pdiang sngewbha ia ki lad pynroi khlem da ktah ia u Uranium bad pynsniew dur ia ka Mei mariang” ong ka khubor na U bah BS Lyngdoh, President Langrin Youth Welfare Association (LYWA).
Phi don ban ong eiei?