Moscow: Ka Russia, ka la kyndit jur ha kine ki sngi, ha kaba uwei na ki heh duh shipai jong katei ka Ri, ula shah siat iap, ha Kharkiv, kaba dei ka nongbah, kaba heh tam hadien ka Kyiv.
U Vitaly Gerasimov, u dei u shipai heh duh, uba ar ha katei ka Ri bad ula shah siat iap, ha ka taiew ba ladep bad hadien U Gerasimov, u dei sa U Major General, Andrei Sukhovetsky uba la shah siat iap, ha ka kad liengsuin ha Hostomel, kaba jngai kumba 30 mer jong ka Kyiv.
Ki don ki heh shipai ha Kremlin, kiba kam, ba ka jingthmu ban hiar thma ia ka Ukraine, ha ka 24tarik Rymphang 2022, ka dei ka rai kaba bakla shi katdei. La shim ruh ba ka jingiap jong kitei ki heh shipai, ba kynthup ia U Major General Vitaly Gerasimov, uba dei uwei na ki heh shipai, ba iajan bad U Putin, ka la pynduh mynsiem shi katdei ia ki shipai jong ka Russia.
Ka khubor na ka tnat shipai ka Ukraine, ka iathuh ba U Gerasimov, u dei heh duh jong ka tnat shipai, ka 41st Army, ula shah pyniap lang bad bun ngut kiwei ki heh shipai, ha ki bynta ba sha mihngi jong ka Kharkiv. U Gerasimov, ula don bynta ban kurup ia ka Crimea ha u snem 2014 bad ula dei ruh uba ioh ia ka nam kaba khraw bha ha Russia, namar ba u ialam ia ki shipai ialeh sha Syria bad nangta sha ka thma ha Chechen.
Phi don ban ong eiei?