Kyndang RTI, halor ki skhim NREGS

Kumba la pynkup bor da ka RTI Act, 2005, katto katne ki nongshong shnong jong Ka Kyndong Wahlang, Mawkneng bad Sohiong ki la leit kyndang lyngba ki RTI application ia ki skhim NREGS bad kiwei kiwei ba la ai da ka sorkar India ha ki paidbah jong ka constituency Sohiong ba la buh ia kine ki skhim NREGS bad kiwei kiwei ki skhim ha Sohiong Block.

Katkum ka jingiathuh jong u Bah Overwell Lyngdoh, u ba long uwei na ki Rangbah jong ka shnong Kyndong Wahlang, u la ong ba kane ka shnong ka la ioh ia ar tylli ki skhim ban shna ia ki R. C.Cement motorable approach road sha ki ar tylli ki lum jingtep, kawei jong ka balang Katholik kaba 350 meter ha ka dor T.8 lakh tam bad kawei pat jong ka Balang Presbyterian kaba 200 meter ha ka dor T.5 lakh tam. La pyntrei ia kine da ka VEC jong ka shnong Kyndong Wahlang. Ka RTI ka la lap ba ia kine la pyntrei tangdep rukom, trei torti, duna jingthew bad kim long katkum ki plan, estimates bad specification.

Halor jong ka jingpyntrei torti, duna jingthew, jah ki materials bad leh tam halor ka kingdon ki nongbylla sngi (jobcard holders) jong ka shnong la don tang kumba 120 iing ei ei hynrei la pynmih 157 tylli ki job Card, pyrshah ia ki jingbthah ka NREGS. Kumta ki Nongwad RTI ki la ujor sha u BDO hynrei u BDO u la leh kyllain, pynslem bha bad iashah ia ka VEC. Kumta la ujor sha ka DRDA bad ka DRDA ka la hukum ia u BDO ban kyndang ia ki jingtrei bad ban shna biang ia ki. Ban da rapjot, ka VEC ka la shu lape malu mala tang ban lait shah trei shuh shuh, hynrei khlem lah da ei ei ia ka jingpyntrei dep rukom. Halor kine kiei kiei bad hapoh ka jingialam jong u Rangbah shnong, u Bah Khlain Sing Nongbri, u ba long artat u Chairman ka VEC, la pynlong ia ka dorbar shnong ha Kyndong Wahlang ha ka 21/11/2020.

Ka la don ka jingiatai kaba jur bad la don ka jingiapait Jan marshiteng hapdeng ki nongwan dorbar; don kiba iashah ia u Bah Overwell Lyngdoh, u Bah Simon Jarain bad kiwei, bad don kiba kyrshan ia u Bah Khlain Sing bad kiwei ki dkhot ka VEC. Da ka ba nion jubor la shim ia ka rai ha kajuh ka sngi long dorbar 21/11/2020 ban behshnong noh ia u Bah Overwell Lyngdoh bad la pynmih ia ka rai da ka jingthoh. La wah ia kane ka jingthoh ha ka 22/11/2020 ha Dorbar Hall ban iohi lut ki paidbah ka shnong ka thaw.
U Bah Overwell u la iathuh ruh ba la wad ruh da ka RTI na kajuh ka Block halor kumno la pyndonkam ia ka skhim PMKKKY ha ki shnong baroh ki ba ha ka Constituency Sohiong. La ioh jingtip ba la pyntrei ia kane ka skhim da ka Block ha ki shnong da kaba ai kyrteng ia katto katne ki briew na shnong. U Bah Overwell u la iathuh ruh ba na ka liang jong u bad kiwei ki para ba ia ai RTI ki la rai ban leit shaduh ki bor ba hajrong ban ioh ia ka hok.
(HA LEN MAWTAP-A)
Uwei pat u Rangbah bashlur bad u ba tip bha na ka shnong Len Mawtap-A, u Bah Bankynsai Thabah, u la wad jingtip bniah lyngba ka RTI na ka bynta ki Skhim NREGS bad PMKKKY ha shnong la jong, ka Len Mawtap-A, ka ba long kawei na ki kyntoit ha Sohiong. Hapoh ka skhim NREGS kane ka shnong ka la ioh jingtrei da ka Check Dam kaba shongdor T.6,99,430 hynrei ynda haba u bah Bankynsai u la leit jngoh ia ka Dam ym don Check Dam satia. Shuh shuh, ym lap satia ba don wah lymne ka nur um hynrei shu lang umrit tang malu mala ha ka aiom lyiur. Kumta u bah Bankynsai, ba kyrteng sin, Bah Raja, u la ujor sha u BDO jong ka Block Sohiong halor Kane. La pynlong ka jingtohkit bad la lap bym don Dam satia. Kumta, la hukum ia u Bah Kmel Nongbri, Chairman jong VEC, ban pyntrei noh ia ka jingtrei katkum ka plan bad estimates. Kaba lyngngoh ka long ba ia ki kot ki sla, ki bill la dep pass da u Technical Assistant, Junior Engineer bad la kubur da Gram Sevak bad kumta, la dep siew lut ia ka peisa ba la mang.
Ka VEC ka la ioh jingtrei na kajuh ka Block ban tei ia ka Retaining Wall bad ban pyndap maw bad khyndew ia ka kaba shongdor T.18 lakh. La lap da u bah Bankynsai ba la shu pyntrei tang dep rukom ia kane ruh da ka VEC ba long Chairman u Bah Kmel. La lap ba ka jingtrei ka duna jingthew bad la pynduna shibun ia ki materials. Namar bym patiaw ka Block, la ujor sha ka DRDA halor Kane ruh. Ka DRDA ka la hukum ia u BDO ban pyntrei janai ia Kane ka jingtrei katkum ka plan bad estimates.

Nangta kajuh ka VEC ka la ioh ban pyntrei sa ia ka Masonry Wall ban iada ia ka iing briew kaba la jan khyllem artat lada slap. Kane ka kynroh ka shongdor T. 6,06,131 lakh. La lap ba kane ka jingtrei ruh ka duna ka jingthew, ka long kaba torti bad thurmur, ka jingpyndonkam ia ki material kam long satia katkum ka jingbthah ka plan bad estimates na Block. Kumta la ujor biang sha Block ban pynpra noh, shna biang na na sdang bad bud thik ia ka plan bad estimates.

Kajuh ka VEC ba Ialam da u Bah Kmel ka la ioh sa ia ka jingtrei ban shna ia ka RCC Retaining Wall ha Lumsohkhlur ba 49 meter kaba shongdor T.10,39,900. Shuwa ban pyntrei ia kane la mih ki kynrum kynram ba shu lapmiet tang haba iathoh shithi hapdeng ka Block Sohiong bad ka Block Mawphlang, ka Block Sohiong bad u PD jong ka DRDA, u BDO bad ka VEC Len Mawtap-A. Ha kaba kut ka VEC ka hab ban pyntrei ia kane ka jingtrei. Ka jingpyntrei ia kane ruh la lap shibun ki jingduna ha ka jingthew bad kiwei kiwei ym katkum ka plan, estimates bad specification.

Nangta, kane ka VEC ka la ioh ruh na Block ban pyntrei ia ka RCC Foot Path ha shnong kaba 200 meter ha ka for T.4,69,200. La lap ba kane ka jingtrei ka duna 32.5 meter.

Da u Bah Philip Marwein