Kyndang ka KSU ïa ka ktem ïadih drok bad kam awria ha Laban

Shillong:Ka Khasi Students Union (KSU)-Laban Circle kala leit kyndang ïa kawei ka Shelter Home kaba don ha Kenches Trace (Harrison Bridge), kaba dei ka ktem ïadih drok bad kam awria bad kynthei bad shynrang.

Kane ka jingkhynra ka KSU ka la jia hynnin ka janmiet sngi Palei, hadien ka jingsaphriang jong ka video ha ki rynsan social media, kaba pyni ïa katto katne ngut ki samla kynthei bad shynrang kiba dang ïa injek drok ha kane ka Shelter Home.
Katkum ka jingong ka KSU, kane ka Shelter Home ka dei kaba la shu ieh lyngkrang da ka Shillong Municipal Board (SMB) haduh ba kala kylla long ka ktem dih drok bad leh kam awria.
Ka KSU Laban Circle ha ka jingsynran ki Pulit ka Laban Police Station, kala khynra naphang ïa kane ka Shelter Home bad ïoh kurup ïa ki nar injek bad ki tyndong plastic ba ju buh drok.

Hynrei ha kane ka jingkhynra, ym shym la lapdien satia ïa ki briew. Ka KSU ka pyntip ba ka la ïoh jingtip ïa ka kyrteng jong kine ki kynthei bad shynrang kiba ïa injek drok bad ïa kine ki kyrteng la aiti sha ki Pulit ba kin leh ïa kaba donkam.
Ka KSU-Laban Circle kala pyntip ba kan sa leit buh da ka dorkhas ha u Chief Executive Officer (CEO) ka Shillong Municipal Board (SMB) ba dawa ban buh noh da ki bor pahara ha kane ka jaka nalor ban kyndang noh ïa kine ki briew kiba pynlong ktem sniew ïa kane ka jaka.