Kylluid ka Motphran, kynriah ki nongdie sha Them Anjali

Shillong, 24 Jylliew:
Ka Motphran mynta ka janmiet ka la kylluid na ka jingbym shah ki tnad pulit jong u syiem ka Hima Mylliem ban shong die jingdie ha katei ka surok. Kumba ka long baroh shi katta tang mar ia poi ka noh phai sngi, ki nongdie jingdie ki pyndap smam ia ka Motphran haduh ba ka la long kaei kaei kaba shitom wat tang ban iaid lynti ruh. Kaba la pynlong ia katei ka jaka ban khapngiah ka long ruh namar ki bos saw kiba kamai sha Mawlai ruh ki ieng ha katei ka jaka bad ki kali kiba mih ban leit sha ki bynta jong ka Garikhana ruh ki hap ban iaid na katei ka surok.
Hynrei na ka jingshah khang ha ki pulit u Syiem ka Hima Mylliem mynta ka sngi la iohi ia ka jingieng kylluid mynsiem ki nongleit nongwan kiba thmu ban ap bus ne ap kali sha ki bynta ba bun jong ka Shillong. Kane ka la wan ruh tang shi sngi hadien ba ka kynhun ki nongdie jingdie ha rud surok ki la phah dorkhas sha ka sorkar jylla halor ki jingeh kiba ki ia kynduh. Hapdeng ka jingap ba pyrkhing jong ki pulit pynban na ka liang u Nongthoh khubor u la lap ba kitei ki nongdie jingdie kiba ju shong man la ka sngi hangtei ha Motphran, ki la wan ban die jingdie pat ha Them Anjali ha ka lad ban leit sha Iewduh bad Them Motor.
Kitei ki nongdie kumba ju long ki la pyrta ia la ka dor jingdie jong ki kum u sohshaw, ki jhur , ki piat , bad kiwei kiwei hynrei ym shym la don pulit Syiem pat u ban wan khang ia ki wat hapdeng ka jingkhap ngiah kaba jur bha ha katei ka jaka. Ka jingkam ki pulit Syiem ban khang ia kitei ki nongshong die jingdie ka long namar ka jingkhap ngiah palat bad kaba la wanrah ia ka jingeh kaba jur bha hapdeng ki nongshong die jingdie bad ki nongleit nongwan ha katei ka jaka kumjuh ki kali kiba kyntiew bad pynhiar nongleit nongwan ha Motphran.