Kyllon iap u GNLA ba dang 18 snem

Shillong, 18’lyngkot:
Ki pulit ka jylla mynta ka step ki la leit ban khynra ia ka jaka rieh tngen ki lehnoh GNLA, katei ka jingleit khynra ka lalong ha ka por 5:30 baje dang step. Katei ka jingleit khynra ki pulit ka dei hadien ba ki la ioh jingtip ba ki don ki snar ka GNLA kiba donkti ban pynbthei bom ha ka 9 tarik u Kyllalyngkot ha Williamnagar khamtam u nongialam jong ka uba la plan ia katei ka kam kata u area commander u Ajan Momin uba ju khot sin ruh kum u Jimmy. Ha katei ka jingleit khynra ki dkhot ba satar katei ka seng ki la ioh ban phet krad hynrei uwei u dkhot ba dang 18 snem karta pat u la kyllon iap hashen.
U dkhot ba dang 18 snem uba la kyllon iap u dei uba la tip kyrteng kum u Chibok Ch Marak , utei u la ngat kuli ha ka jingiather kuli kaba mar kylliang hapdeng ka GNLA bad ki pulit ha ka shnong Bangongre kaba don hajan Williamnagar. Ki pulit ki la iathuh ba ki lehnoh GNLA ki don ha kliar lum kaba jngai kumba 800 mitar eiei bad haba ki pulit ki pyrshang ban tur sha katei ka jaka ka GNLA ka la ther kuli sha ki bad hangtei la mih ka jingiather kuli kaba mar kylliang.