Kyllain myngor ka BJP ban pyrshah sia lieh ha tnad pule

Shillong, 25 Nailur:
Ka BJYM (BJP Youth Wing) Meghalaya, ka la shong kyllain myngngor mynta ka sngi hajan ka All India Radio, Shillong ban pynpaw ia ka jingpyrshah ia ka sia lieh na ka thungkam sop sop ha ka tnad pule pule ka jylla.
Ka shong kyllain myngngor ka la sdang naduh ka por 10:30 mynstep haduh ka por 12:30 noh phai sngi. Ki nongialam ka BJP kynthup u president ka tnad samla bad seng kmie nalor ki dkhot ki la wan ban iashim bynta ha kane ka jingiakhih ba jai jai.
Ka jingthmu kane ka jingshong kyllain myngngor ka long shibynta ban pynbor ia ka sorkar ba kan leh eiei ne ban pynshitom ia ki ophisar, minister, MLA bad ia baroh kiba donkti ha ka jingtah sia lieh ha kaba ia dei bad ka jyrsieh thungkam nonghikai kumba la lap da ka kaiphod ka CBI.
Ka BJYM ka dawa mardor na u myntri rangbah ba u dei ban pynhiar shuki ne wengnoh ia kito ki MLA bad Minister kiba donkti ha kane ka kam pynkhein ain. Ka la dawa jur ruh ia ka sorkar ba kam dei ban iashah liang hynrei ban iaid ha ka jingsynshar kaba khuid bad ban iaid katkum ki kyndon ain ban pynshitom ia kito ki longheh kiba pyndonkam bakla ia ka bor jong ki ha ka kam thung nonghikai.
Ka seng ka la ong ba ka jingleh mynthi ka sorkar, ka la don ka jingktah kaba jur ia ka jingpule ki khynnah skul kat haduh ba ka kawei na ki Govt School kaba don ha ka shnong Sohiong ruh ka la shah khang khyrdep noh ha kine ki bnai ba la dep. Ka BJYM ka la ong ba kan iai buddien ia kane ka kam na ka bynta ka bha ka miat ka pule puthi kaba dei ka jaka ban saindur ia ka lawei ki khynnah skul, ong u samla Egenstar Kurkalang, u ba dei ruh u President ka BJYM (BJP Youth Wing) Meghalaya.
Ha kane ka jingshong kyllain, la thoh ha ki lama, “Sia lieh ban pynbeit ia kaba bakla ym ban pynbakla ia kaba beit” bad kawei pat ka ong, “Ka Ain MUA II kam dait ia kiba heh, ka khniot ia kiba rit bad kane ka sorkar ka pynshlur ia ki kam bamsap”.
Ha kane ka sngi kiba la wan shimbynta lang ha kane ka jingiashong kyllain myngngor ki kynthup ia u President bad General Secretary ka BJP Meghalaya (Parent’s Body, u bah Khlursing Lyngdoh bad u N.Chakraborty.