Kylla sohpdung U bah Don Sumer, ba iashrut u bah Pynshngaiñ bad u Mukul

Shillong, 22 Lber:
Namar ka jing iashrut u bah Pynshngaiñ N Syiem Chief Executive Member ka KHADC bad u Dr.Mukul Sangma myntri rangbah ka jylla la shu kylla sohpdung ei u MDC ka UDP na Umsning u bah Donkupar Sumer. Hadien ka jingrisaiñ u bah Donevan Kharwanlang na ka shuki EM ban leit sha ka shuki Deputy Chairman ka EC u bah Pynshngaiñ ka la ailad ia ka UDP ban leit shimti ia katei ka kam EM kaba lait.
Ki tyllong khubor kiba u Rupang u la ioh lum la iathuh ba tang mar ia risaiñ u bah Donevan na ka shuki EM, ka PDF kaba bat ia ka bor synshar ha KHADC ka la mynjur ia ka kyrteng u bah Donkupar Sumer ban shimti ia ka kam EM kumba la jied hi da ki MDC ka UDP ha KHADC ia ka kyrteng jong u.
La iathuh ba ka kyrteng u bah Sumer ka la don ha ka tnad District Council Affairs ka sorkar jylla la ar taiew mynta hynrei haduh mynta ruh kam pat ioh ka jingmynjur na katei ka tnad bad kam pat leit sha u Lat ka jylla. Katto katne ngut ki MDC haba ia kren bad u Rupang ki la pynpaw ka jingsngewdiaw mynsiem ia katei ka jingleh ka sorkar naba tang namar ka daw ba u myntri rangbah u ia shrut bad u CEM la shu kylla sohpdung ei ki MDC.
Haba wad jingtip kham bniah na ki tyllong khubor la ioh jingtip ba ka tnad DCA kam pat kyrkieh ban mynjur ia ka kyrteng utei u EM ha kaba la ong ba ym pat lah ban antad sa kumba katno por ka DCA kan shim por ban mynjur ia ka kyrteng u bah Sumer.