Kylla pung dohkha ka Surok Mawlai

Shillong,9 Naitung:
U MDC ka Mawlai Konstitwensi u bah PT Sawkmie u la thoh sha u Chief Secretary ka sorkar jylla u bah PBO Warjri ba un bthah ia u Executive Engineer ka Shillong Central Division ba un peit ia ka jingsniew palat ka surok iaid kali ha baroh kawei ka surok bah bad ki lynti iaid kali hapoh ki surok shnong ka Mawlai baroh kawei.
Ute u MDC ha ka jingthoh sha u CS u la ong baroh ki lynti iaid kjat bad ki surok ha Mawlai ki la sniew lut bad ki la kylla kum ki pung tongum bad ki pung khwai dohkha bad ka la pynjynjar ia ki paidbah nongshong shnong kham tam ki nongniah kali.
Ha katei ka jingthoh u la pynkynmaw ba ha u snem ba la dep u la ia kren ia u EE ( Shillong Central Division ) hynrei um shym la pynshah shkor haduh mynta ruh bad dei na katei ka daw ba u hap ban  thoh noh sha u Chief Secretary.