![](https://www.urupang.com/wp-content/uploads/2024/03/image-20.png)
Agartala:Ka Seng sain pyrthei ba bun paid eh jong ka liang lyrshah ha Ïingdorbar Thawaiñ jong ka jylla Tripura, ka Tipra Motha Party, kaba la pynduh thiah pyn duh dem ruh ia ka sorkar BJP da ki jingiakhih ba khlem sangeh la palat shisnem jong ka, ka la leit ban kyrshan noh ia ka BJP bad iasoh lang ha ka Sorkar.
U Nongialam jong ka liang pyrshah hapoh Ïingdorbar Thawaiñ jong ka jylla Tripura bad Nongialam ka Tipra Motha Animesh Deb barma ha ka sngi Palei, u la bam smai kum u Myntri Sorkar jong ka jylla ha ryngkat bad uwei pat u MLA ka party u Biswa kety Debbarma u la shah thung kum u Myntri Khynnah.
Ka rai ban leit iasnohkti lang bad ka BJP-ka party kaba ka iakhun bha ban ioh jaka ha Tripura, ka la wan jia hadien ka jingiasoi ia ka soskular ba lai liang mamla hapdeng ka Sorkar Jylla, ka Sorkar Pdeng bad ka Tipra Motha ba long ha ka taiew bala lah.
Ka Tipra Motha Party ka dei ka parti ba la pynmih da u Pradyot Manikya Debburman, u khun syiem ka Tripura, ban iakhun ia ka hok jong ki paid riewlum ha jylla Tripura.
Kala mih nyngkong eh ban iakhun ia ka elekshon ha ka elekshon MLA ba long ha u snem bala lah. Ka Tipra Motha kala pynieng 42 ngut ki kyrtong ba kynthup ia 20 ngut na ki constituency bala bhah tang sha ki riewlum. Kane ka party kala jop haduh 13 seat bad ioh haduh 19.69% ka jingioh vote.
Ka jinglah jong kane ka parti ban ioh khur bun ki vote ha ka elekshon ka la pynlyngngoh ia kiba bun ki stad pyrman elekshon.
Hynrei ka parti BJP ka la bat biang ia u la kam synshar hadien ba ki la jop bad ioh thaw sorkar marwei ban pynduh noh ia ka jingphohsniew jong ka Tipramotha ban thaw sorkar, hynrei kiei-kiei baroh ki dang shu kylla kynsan ha ka taïew ba dang shu dep.
Hadien ka jingiasoh bad ka parti BJP ha ka sorkar u Pradyot Manikya Debburman u la pynshai ba ka parti jong ki kan bteng ban peit ngor haba iadei bad ka hok jong ki riewlum ritpaid watla ki don ha ka sorkar.
Ka jingmih noh jong ka Tipramotha, na ka liang pyrshah ka la pyntlot bad wanrah ruh ia ka jing shaiong ngain ia ki seng saiñ pyrthei ha ka liang pyrshah.
Hadien ba ka parti ba bun paid ha ka liang pyrshah bad ka parti ba bun tam ki dkhot hapoh ïingdorbar thawain ki la iatreilang ki party kiba don ha ka kynhun synrop jong ka Liang Pyrshah ki dei ka Congress bad ka parti CPI-M.
Phi don ban ong eiei?