Nongpoh: Kawei ka trok kit dewiong kaba don ia u number ML 04C 6884, kaba la mih na Ri lum Jaintia bad kaba la pyndonkam ban iaid lyngba ki surok kyndong na ka bynta ban poi sha Assam, ka la kylla noh hynnin ka miet ha ka shnong Jatah kaba don ha ki thain Mawhati ha Ri Bhoi.
Ka jingtip kaba la iohlum na ki paidbah jong katei ka thain, la iathuh ba katei ka trok ka la kylla hynnin ka miet ha katei ka shnong bad la iathuh ruh ba katei ka trok kaba kit Dewiong, kaba la mih na Jaintia ka la rung lyngba ka surok na ki thain Nartiang ban mih sha Mawlasnai ter ter sha Tyrso, da ka jingthmu ban mih sha Mawhati ban pynpoi sha Assam, hynrei haba la poi sha katei ka shnong, katei ka trok ka la kylla noh.
Ki la iathuh ruh, ba watla kim tip ba ki dei ki trok kiba kit ia kino ki mar, hynrei ki briew kiba sah ha katei ka thain, ki la iathuh ba bun ki trok kiba la pyndonkam ia katei ka surok, kiba la wan na ki thain Jaintia da kaba pyndonkam ia katei ka surok ban mih sha Mawhati, kaba dei ka surok kaba mih sha Umsiang bad sha ka jylla Assam.
Phi don ban ong eiei?