Kylla ka Night Super ha Umlidoh bajan shah jynrat ha ka Trok

Jowai, 31 Nailar:
Ka jingiatyngkhuh kali ha u surok bah NH -44 Jowai Shillong Road bad Jowai Badarpur Road ka la jia jan man la ka sngi.
Mynta ka sngi Ba-lang, ha ka por 3 shiteng eiei mynstep phyrngap, kawei ka night super bus (As 10 C 4187) ka la kylla ha Umlidoh tang na ka daw ba ka hap ban kiar tyngeh ia kawei ka trok kaba niah khlem akor. Ha kane ka jingjia 5 ngut ki briew ki la mynsaw bad la pynkit ia ki sha Civil Hospital Ialong.
Shuh shuh kawei ka trok (NL01K 9592) ka la synrud ia kawei ka kali Maruti Van ha Khliehtyrshi hynrei ha kane ka jingjia ym shym la don mano mano ba mynsaw.
Ha kane ka sngi Nyngkong ka kawei ka kali Maruti Swift kaba kamai na Jowai sha Shillong ka la shah tynrah ha ka trok shipai bad kiba shong ha katei ka kali kamai ki la mynsaw kynthup ia ka kmie bad u para jong une u nongthoh khubor na Jowai, ka kong Nosting Siangshai bad ka dang don mynta ha Nazzareth Hospital ban shah sumar. La iathuh ba katei ka trok shipai la niah da u driver uba dang shah hikai.
Shuh shuh ha ka por 9:30 pm eiei kawei ka trok kaba kit Clinker na Lumshnong, ka la tynrah ia ka jaka iing ki pulit pyniaid kali ha Lad- Nartiang (Lad Police Reserve/ Lad College) haduh ba katei ka jaka ieng ki pulit kaba la shna bha da ka dewbilat ka la pra pom.