Kylla ka kali ba wan phutbol

Shillong,7 Naitung:
Ka jingkloi ki shipai ka Assam Regiment Centre, ban kner ia ki kti iarap jong ki , ki la lah ban pyllait im ia ki khynnah samla kiba don shi sumo ha ka jingjia aksiden kaba la jia mynta ka sngi hakhmat khyrdop shipai. Katei ka jingjia ka la jia ha ka por 5:30 baje janmiet ha main gate jong ka of Assam Regimental Centre . Ha katei ka sumo ki la don haduh 21 ngut ki samla kiba la ia shong khapngiah bha ha kawei ka sumo kaba don ia u nombar ML 05 G 9057, hynrei namar ka jingkit palat u nongniah um lah ban teh lakam shuh ia ka kali kaba u niah bad ka kali ka la kylla noh.
Haba la iohi ia katei ka jingjia, ki shipai kiba ap pahara ki la mareh wut wut ban ai jingiarap ia kite ki samla bad ki la pynkit mar-mar sha MI Room jong katei ka Centre ha kaba u Regimental Medical Officer u la io ban sop ban spain ia kiba mynsaw.
Uwei na kiba la mynsaw kham jur u dei u Immanuel Lalrokung uba shong basah ha Demthring, 9 ngut ki la mynsaw malu mala. Kitei ki samla ki dei kiba dang wan ialehkai phutbol na Mawshbuit.