Kylla jait dkhar U Jagir

Shillong: Ka Khasi Students’ Union War Jaintia Circle, ka ai khublei ia ka Sub Divisional Officer (Civil), Amlarem Sub Division Madam, ka kong J.U Kharpuri, kaba la shimkhia ia ka jingujor ka seng ia uwei u bar jylla uba kyrteng u Jagir uba la ai kur Dkhar, uba la ioh ruh bad ka Epic Card jong u hapoh ka shnong Mupyut. Ka seng kam lah ban shu peit ne shong kli kti ia kane ka rukom leh ki bar jylla bad ka pynrem jur ruh ia ki Rangbah Shnong kiba la ailad ia kum kine ki briew ba wan na ei na ei ban shim ia ka Kur Khasi Khara jong ngi. Na ka liang ka SDO ka la khot hajir ia une u bar jylla ha ka 28tarik Jylliew 2019, halor ka jingpyndonkam bakla ia ka jait Kur Dkhar kaba long pyrshah ia ka ain bad lah ruh ban pynshitom katkum ki kyndon ain. Ka Seng ka kyntu ruh ia ka Kur Dkhar ba kin tuklar ia kane ka bynta khnang ba kito kiba leh thok leh shukor ha ka kur ka jait kin ngat ha ka ain. Ka seng ka maham jur ruh ia kito ki menieid bar jylla kiba pynioh rashon card, epic card ia ki bar jylla hapoh ka Amlarem Sub division da kaba shu leh thok ba ki dei ki nongshong shnong ba pura ha ka thain War Jaintia, ong ka kyrwoh ba la phah da u General Secretary Samla Lurman B. Talang.