Kylla itynnad, ka lynti ïaid kjat ha Riatsamthiah

Shillong:Kan long kaei kaei kaba pynsngewtynnad shibun ïa kiba bun kiba ïaid ba ïeng napoh ka lynti ïaid kjat kaba don hapoh ka shnong Riatsamthiah, Shillong hadien ba katei ka Shnong ka la lah ban pynwandur thymmai biang ïa katei ka lynti ïaid kjat.

Lah ban pynkynmaw ba ha ki por mynshwa katei ka lynti ïaid kjat ka long kaba kham pynsngew tieng ïa kiba ïaid ba ïeng na katei ka lynti namar ba bun palat kiba ju mlien ban shongkai ha katei ka lynti, khamtam eh ha ka por ba lah dum ka suiñ bneng.

Katei ka jingdon kiba shongkai ha katei ka lynti ïaid kjat ka wanrah ruh ïa ka jingsngew salia bad sngewtieng ban ïaid lynti wat ha ka por mynsngi ruh.
Namar ka jingdon ruh ka kynroh rel ha ki por mynshwa ka long kum ka lad jong kiba shimkabu ban shongkai bad ban leh ruh ki kam ba bunjait.

Hynrei mynta naduh ba la pynpra ïa kitei ki kynroh rel, bad shna bad pynwandur thymmai, katei ka lynti ïaid kjat mynta ym tang ba ka la kham shngaiñ, hynrei ka la long ruh kaba itynnad khamtam haba wan hiar ïaid kjat ban ïohi artad ïa ka jingitynnad jong ka Wahumkhrah.