Kylla dujok noh kane ka pyrthei mynta

Babu Kular Khongjirem

Ka phawer u Aesop ka la maham lypa iangi baroh ba,’Nang bun u bynriew,nong bun ka byrsieh’.Kumba ruh kalong shisha mynta,Kane ka pyrthei ka la jot,kane ka pyrthei ka la tap sa tang da ka pop ka sang suda kat sha phai,,ka sniew ka smeh,ka thok ka shukor baroh kin kynrei lut mynta.

Ym don ba sngap shuh ia ka Hok ka Jingshisha namar la kren briew lut ka pisa ha baroh ki kam.Leh kano kano kaba pap ne kaba sang,leh ia kano kano kaba pyrshah ia ka mon u Blei,ia kata,ki briew kin iaroh bad ai burom pynban ia kum kita.Haba la kren briew ka ‘eit Ksuid'(ka pisa), ka Hok ka jah sa kyndong.(When money speaks,the truth kees silent). Peit kein mynta ha ki liang baroh,katba ka kamai ka kajih bad ka kam ka jam ka la nang ring sdot ring swai, ka kam khaii pateng ka la nangrit nang sdot man ka sngi,katba nang kordit bad jynjar ki paid trap ki paid knup,ki luk ki lak bad ki thap ki dap baroh, hynrei,katta pat nang rben ka ‘eit Ksuid'(pisa) tang ha ki katto katne ngut.

Lada leh ia kaba dei,kaba shisha bad kaba hok,ym don ba sngap shuh mynta.Lada phi nud bam lamler, leh ia kaba pop kaba sang bad ka bym dei,leh da ka buit tuh ka arsap ka arphong,leh ia ki kam bym man,kata te,kin mane bad nguh ia ki la kumba nguh ia U Blei. Ban kamai ia ka Hok kumba ong ki Khasi hyndai,ban nym tuh ne thok ne shukor kumba la thoh ha ka Shiphew Hukum,kata, ka la kylla kam kai lut baroh mynta.Ki briew kiba hok,kiba bha bad kiba shisha mynta ki don sa tang khyndiat eh.Bun kiba la ngop lut sha ka pop ka sang,ka thok ka shukor bad ki jingthala ba lait phew jait jong kane ka pyrthei mynta.Ki briew kiba bha,kiba beit bad kiba shisha ki don thoh mut thoh mat khyndiat khysoit hangne hangtai.Ki la kylla long noh tang kum ki jaka sei soh ha ka jaka ri shyiap kaba heh bad kaba iar.(they are like little oasis in the desert of barbarism).Lada lah bun kiba kwah leh pop ban ia kiba leh hok,kata,kane ka pythei ruh ka la kylla long noh kum ka ‘paradise’ jong ka dujok ne ka ri jong ka pop.

Hato,kito kiba dang pyrkhat ia kaba hok,kaba dei bad kaba shisha kin leit ia ngop lang noh bad kine ki riew bym man(wicked people)?Hato,ka jingiatip lem kiba hok ka shah ia ki ban ia ngop lang noh kumta?. Ki ju ong ba ka history ka ju wan jia biang ia kajuh ka jingjia.(history repeat itself).Lada kane ka dei shisha,ka juk u Noah bad ka ing lieng(Ark) jongu kan wan jia biang ia kine ki briew(wicked people) kiba la leh ia ka pop ka sang ha kane ka pyrthei haduh katte.Lada phai pat sha ka History u Hynniew Trep u Hynniew Wasa, ka juk jong ka Diengiei( ka juk jong ka Pap ka Sang) kan wan jia biang.Tip dang don ne em ka Phreit ban iathuh lem ba wan jlah u Khla ia ka Diengiei khnang ba u khun bynriew un tip ia kata mynta?.Lane, ka juk ba ka Sngi(ka Hok ka Shi kyntien) ka la leit rieh noh sha krem lamet sha krem latang, tip dang don ne em u ‘men lyngkhoit men lymboit'(u Syiar krad jutang) ha kane ka juk mynta uban dang lah ban pynngeit biang ia ka sngi(ka jingshai halor ka Hok ka shi kyntien) ba kan wan phai biang sa shisien sha kane ka pyrthei?.’Shwa ban paw u Ksuid u Khrei, Baroh ki mane ia u Blei.’Ynda lah bun palat kiba stad pat,kumba ka long mynta, u Soso Tham u thoh,’Long Syiem ka Dum,Synshar ka Bieit,Ka long Raiot ka Tieng ka Smiej,Ka Hok ka shong ha Shnong u Blei,Ka Pdok(pla pisa ne synduk pisa) u Briew ha Snieh Pyrthei.’