Kylla drama ka surok Shillong-Guwahati ba iakhih ki trok

Shillong, 8 Rymphang:
Hapoh shi taiew hadien ba la hiar thma bad thang ia ka jingthew ia ki trok kit dewiong ha Umling, ka Ri-Bhoi, ki nongniah ha kane ka sngi khang maw ia ka surokbah Shillong-Guwahati bad sa ha kane ka sngi Saitjain, ki la khang lynti bad iakhih ban dawa pynlait ia san ngut ki nongniah trok kiba shah kem dang shen.
Hynnin ka sngi Saitjain da ki spah ngut ki nongniah trok ki la khang ia ka surokbah ban dawa ba dei ban pynlait noh ia ki nongniah trok ba shah kem bad kane ka jingiakhih ki nongniah trok ka la pynkulmar thlim ia ki bor synshar district haduh ba kin hap ban phah bor iada wut wut sha katei ka jaka.
Ki nongniah trok ki la bitar jur ia ka jingpynslem ban thew ia ki trok kit dewiong bad la kynnoh ba ha kane ka jingiakhih, la mih ka jingiapyni bor hapdeng jongki bad ki pulit ha kaba uwei u pulit u la mynsaw. Ym tang katta, ki nongniah trok ki la thang ruh ia kawei ka motor bike bad kawei ka trok rit ha Umran Diary.
Ha kane ka jingjia, ka la pynlong ia ki pulit bad ki CRPF ban kawut lathi ia ki nongniah trok ban beh krad ia ki kiba ialum lymbrum.
Hynrei ha kane ka jingkawut lathi, don ruh ki bym dei ki nongniah trok kiba la shah dei ha ki lathi ki CRPF bad ki pulit.
Ka surokbah Shillong-Guwahati ka la long kum ka madan thma ha kaba ki kali ba iaid ki la sahkut lut bun kynta na kane ka jingiakhih jong ki nongniah trok.
La iathuh ba da ki spah ngut ki nongniah trok ki la ialum lymbung ha surokbah ha thain Umsamlem.
Kham mynshwa, ki nongniah trok kiba la khe bitar, ki la thang ia ka jaka thew ha Umling bad thang ia ka ophis ka DMR, ka Sales Tax bad ka Transport ophis.