“Kylla dieng shaindoh ki Rangbah Shnong”

Shillong, 3 Rymphang:
Na ka jing ia shut hapdeng U Mukul Sangma bad U Bah PN Syiem, ki kylla dieng shain doh ki Rangbah Shnong, ong U Bah Adelbert Nongrim Working President jong ka Khun Hynniewtrep National Awakening Movement (KHNAM), ha ka jingpyn mih khubor mynta ka sngi.
“Lyngba ka jingkren jong u bah Vincent Pala ka la nang shai shuh shuh ba u Mukul Sangma ula pynlong diengshaindoh ia ki khlieh nongsynshar shnong ha Ri Lum Khasi bad Jaintia tang na ka daw ka kam Iing jong ki. Kane ka paw shai ba ka seng Congress hi kam salia ban leh khun jakai wat ia ka kam iap kam im jong ka state tang ban bit ban biang ka party jong ki” ong U bah Nongrum.
U Bah Adelbert, u ong shuh shuh, ba ka jingkren jong u Mukul Sangma ha ka jingialang jong ki Nokma Council ha Ampati, ka la pawpenryngkew ha ka dur ka dar ba thikna jong u kum u Myntri Rangbah ka Jylla. “Ka jingkren jong u ka pynpawshai ba ia ki Nokma dei ban pynkhlain, aibor, iada kyrpang, burom, pynim pat, kat kum ba la ai bor da ka 6th Scheduled jong ka Riti Synshar India bad u da kular ruh ba ka sorkar jong u kan ai bor shuh shuh ia Riti dustur ha kaba ma ki kum ki Nokma ki don ka bynta ba kongsan bha. Une u juh u briew uba thmu ban knieh noh ia ka bor shynshar shnong ha Ri Lum Khasi bad Jaintia da kaba shna hi noh ki ain lyngba ka State da kaba iaid lait ia ka 6th Schuduled , mynta u kren 6th Scheduled ha Garo. Hato kane kam dei ka jingkren ban pyniashrut ia u Khasi Jaintia pyrshah ia u Garo?” ula ong shuh u nongialam ka KHNAM.
Kane ka jingleh, ka dei beit ban pharia ia ka jaitbynriew Hynniewtrep ha ka synshar khadarbad pynskhem ialade na Garo Hills khnang ba ka shuki Myntri Rangbah ha u 2018 kan poi biang ha iing jong u. “Kaba sngewsih shuh shuh kine Myntri Hynniewtrep jong ngi imat ki muja ban sdien bos Mukul bad klet noh ia ka deiti kum kita ki nongmihkhmat. Ai ba kane ka jingkren jong u Mukul Sangma kan pynpei shkor bad pynpeit mat ia ngi ki nongshongshnong khamtam eh ki Nongsynshar Shnong ban ngin iohi jngai ym ban shu ia byrthen kum ki ‘Laren” pynkut ka kyrwoh U bah Adelbert.