Kwah U MR, ban pynhiar jingduhnong ka MeECL sha ka 30pc T.1,400klur, kwah ka MeECL ban bah rah ka sorkar

Shillong, 28 Jylliew:
Ka kynhun jingialang myntri hynne ka la bthah ia ka Meghalaya Electricity Corporation Limited (MeECL) ban pyni ia ka jingbiang ne jingtbit jongka shwa ba ka sorkar kan ai ia ka jingmynjur ban long nongbah khlieh ba kan shim ram haduh T.1400 klur ban shna ia ki jingdonkam bad ban tei ia kiwei ki projek ba kan sa leh ha kane ka jylla.
U Myntri Rangbah ka jylla u Dr. Mukul Sangma u la iathuh ia ki nongthoh khubor hynne hadien ba la wai ka jingialang ka kynhun myntri ba ka MeECL ka la dep aiti ia ka jingtyrwa sha ka sorkar da kaba pan ban long nongbahkhlieh ba kan lah ban shim ram na ki jaka ai bapher bapher ban tei ia ki projek ha kane ka jylla.
U Dr Sangma u la ong ba ka sorkar ka dang pyrkhat namar ba ka MeCEL ka dei ban kham pynduna ka jingduhnong sha ka 30 per cent.
“Ka jingduh nong ba la iakynduh ka MeECL ka dei eh na ka khajna ba la buh sha ki paidbah” la ong u Dr Sangma.
Ula iathuh ba ki nongtyrwa kiba kwah ban pyntrei ia ka Ganol project, ki ong ba ka rem than. U la ong ba ka kaiphod halor kane dang pan na ka tnad ba dei peit khnang ba un lah ban pule bniah shwa ban shim ia ka rai.
U la iathuh ba ka sorkar ka la dep aiti ia ka jingtyrwa sha ka NEEPCO ban leh lang bad ka MeECL na ka bynta ban tei ia ka 240 Mega Watt Power Project ha khappud Meghalaya bad ka Assam.
“Nga la iakren bad u chairman ka NEEPCO ban tei ia ka projek kaba 240 mw bad ka MeCEL kaban long kaba nyngkong hapdeng ka sorkar pdeng bad ka sorkar jylla”, la ong u Dr Sangma.
Kan don ruh ka projek ha khappud ka Assam-Meghalaya ha Karbi Anglong district. U la ong ba ka jylla Meghalaya kan ioh ia ka bhah na kane ka projek hadien ba la treikam.