Shillong:U CEM ka KHADC u bah H.S Shylla u la ong ba u Lat ka jylla u la kwah eh ban mynjur noh ia ki 4 tylli ki Bill jong ka District Council bad u la thoh sha u Commissioner and Secretary jong ka District Council Affairs Department ban pyntip ba u la ioh pdiang ia ki 4 tylli ki Bill kiba kynthup ia ka KHAD ( As Adapted from the Bengal Eastern Frontier Regulation, 1873) Regulation 2018, ka KHAD ( Constitution of Subordinate Council of Traditional Chief and Headmen) Rules 2018, ka United Khasi-Jaintia hills District ( Establishment of Town Committee) ( Second Amendment) rules 2018 bad ka KHAD ( Khasi Social Custom of Lineage ( First Amendment) Bill 2018.
U bah Shylla u la ong ba ha katei ka jingthoh u Lat u la pynpaw ba u kwah jingkynthoh na ka sorkar halor kitei ki Bill ban tip kaei ka jingmut jong ka, u bah Shylla u la ong ruh ba u Lat mynta u hap sa tang ka jubab na ka sorkar bad hadien ba la ioh jingkynthoh na ka sorkar khlem pep un mynjur noh ia kitei ki bill ba kin long aiñ.
Ha kawei pat ka khubor, u bah Shylla u la ong ba ka District Council kan thaw ruh ia ka Synjuk Ki Rangbah Kur kumba la thaw ia ka Khasi Clan bill bad manla ki Kur ki dei ban phah 2 lane 3 ngu tki nongmihkhmat jong ki sha katei ka Synjuk. U bah Shylla u la ong ba dei ka Kur kaba khlaiñ bad ka bym pat shah ktah ha kino kino ki aiñ haduh mynta bad ki don ka iktiar na ka bynta ban iada ia ka jaitbynriew ban lait na kano kano ka jingshah thombor ha ki bor kiba nabar.