Kwah U Dy CEM ban khot ia kren U DC ba khang doh masi

Shillong, 19’lyngkot:
U Bah PT Sawkmie MDC Mawlai konstitwensi uba dei ruh u Dy.CEM ka KHADC ha ka kyrwoh khubor kaba u la phah mynta ka sngi u la kyrpad ia u Deputy Commissioner ka East Khasi Hills u bah P.Dkhar ba un shimkhia halor ka jing dawa bad jingeh ki nongdie doh masi kiba ia kynduh jingeh ha kine ki sngi, kaba la pynlong ia ka Khasi Jaintia Butcher’s Welfare Assocciation ban khang shi syndon ia ki dukan jong ki baroh. Kiba don hapoh sor bad khap sor, kaba ki paidbah ki ia kynduh jingeh.
U la ong ba ka jingeh kaba ki ia kynduh ha kine ki sngi mynta ym tang ki nong khaii masi wat ki nong bylla sngi kiba trei ha kine ki dukan kila shem jingeh namar ba ki hap shong sngi. Kumta u la ong ba u kwah ba u DC un peit ban thaw ki lad kilynti kumno ban weng ia kane ka jingeh da kaba khot ia kren ia ka KJBWA khnang ba ka jingot doh masi kan sdang biang.