Kwah u Dr.Don ba ki kam Grade IV, dei ban trei ki trai shnong

Shillong, 22’lyngkot:
Ka 500 mark kaba dei ka full mark ha ka Personal Interview kam Majistor ha KHADC ka la pynkyndit ia ka seng UDP bad ka la pynkhih jingmut ruh ban pyrkhat ha kaba ia dei bad ka kam interbiw ia ki samla wadkam. U President rangbah ka seng UDP u Dr.Donkupar Roy u la ong ba lada ka UDP kan wan ha ka bor synshar kan wanrah da kawei pat ka rukom pyrkhat ha kaba ia dei bad ka ioh kam iohjam ki samla.
U la ong ba ia ki kam barit ne kiba hap hapoh ka Grade IV ym dei shuh ban khot interview hynrei dei ban ailad beit ha ki trai shnong ba kin trei ia kitei ki kam, “Ia ki kam ba ki trai shnong ki lah ban trei balei hap ban wanrah da ki nong Shillong, balei ban phah nabar haba ki trai shnong ruh ki lah ban trei?” u la ong. Da kaba bynrap biang “Ngin pyrkhat bha ia kane bad ngin pynkylla noh lada ngin don ha ka bor”.
Haba kren ha ka General Council ka UDP Umsning Circle ha kaba ia dei bad ka politik u la ong ba dei ka kyntiap seng ne ka phet seng kaba pynjot ia ka politik bad u la ong ba um pynshlur ban kyntiap seng. “Ngam pynshlur ban kyntiap seng lane ban bun paid da ka jingiaphet seng ban ioh ia ka bor synshar hynrei nga kwah ba ka rai kan dei beit na u paidbah da kaba jied ia ki kyrtong jong ka seng-don ruh kiba ong ba ka dei ka Ghar Wapsi ki ia kmen” u la ong.
U Dr.Don u la kynthoh ia u Dr.Celestine Lyngdoh u MLA ka Umsning uba la jop mynshuwa na ka seng UDP hynrei u la phet noh sha ka seng Congress “U Dr.Bom um dei uba pyrkhat ia ka Party ne ia ki paidbah, u peit tang ka myntoi shimet” u la ong da kaba kdew ba ha ki por ba u Dr.Bom u dang long u MDC jong ka seng UDP la ailad ia u ban long CEM bad ha ka jingshisha dei ban long u bah Teinwell Dkhar MDC ka Shella “Ngi la pynshong noh ia u bah Tein , ngi la ailad ia u Dr.Bom da ka jingkhmih lynti ba ka jinglong CEM jong u kan iarap ia ngi ban jop ia ka elekshon shiteng samoi ha Umroi hynrei ngi la pheil” ong u Dr.Don.