Kwah u Bah Rowel, ban aiti ia ka Umngot sha ka MeCEL

Shillong, 27 Nailar:
U Symbud Myntri Rangbah ka jylla u Bah Rowel Lyngdoh u la pynpaw ba um iahap satia ia ka jingthmu ka sorkar ban aiti ia ki projek bor ding sha ki kompeni ba nabar khamtam haba kim pat lah ban pyndep ia kaba la dep ai ruh.
Ha ka jingiakren bad U Rupang ha kane ka sngi u Bah Rowel u la ong ki kompeni kiba ka sorkar ka la dep aiti ban tei ka ka bording kum ka Kynshi projek bad kiwei, kim pat lah satia ban pyndep. “Balei ban shu ai lut sha ki kompeni ba nabar ban tei ia ki projek bording”, la ong u Bah Rowel.
U la ong ba kum ka Umngot Projek, ka dei ban aiti sha ka MeCEL ne ka NEEPCO kiba dei ki kompeni jong ka sorkar. U Bah Rowel u la kynthoh ruh ia ka jingtreikam jong u Myntri Rangbah u Mukul Sangma ban shu aiti ia ki projek bording sha ki kompeni ba nabar namar ba bunsien kim lah ruh ban ai kam ia ki briew na kane ka jaka.
Katkum ka jingong u Bah Rowel, u Myntri Rangbah um pat khot iakren eiei halor ka jingthmu ban aiti ia ki projek bording sha ki kompeni. “Haduh mynta u Myntri Rangbah um pat ju khot ban iakren ia ka jingaiti ban pyntreikam ia ki projek bording, lehse um don por ne um sngew donkam ban iakren namar ba u dang iakren bad u Myntri ka tnad bording”, la ong u Bah Rowel.
Lah ban kdew ba ki paidbah ka thain kiba ngat ha ka Umngot projek, ki la dawa na ka sorkar ba ka dei ban aiti ia ka jingpyntrei ia katei ka projek sha ka MeCEL namar ba ka dei ka kompeni jong ka sorkar bad kan kham pyrkhat ruh ban thungkam bad pyntrei da ki briew lajong.