Kwah U bah Pynshngaiñ ba ki Khlieh Nongsynshar, kin don ha ka EC

Shillong,15 Nailur:
Ha ka jing ialang sam sanad sha ki 30 ngut ki Rangbah Shnong kijba hap hapoh ka hima Mylliem u CEM ka KHADC u bah Pyn shngaiñ N Syiem u la ong ba ka por ka la dawa ba dei ban ai jaka na ka bynta ki Khliehnong synshar ba kin ioh ban rung lang hapoh ka Executive Committee ka KHADC.“Ia kane ka bynta ngi la ia kren hapoh ka EC, ka la don ruh ka jingsngew iahap na ki dkhot ka EC ba donkam ban ai jaka ia ki Khlieh nongsynshar ba kin ioh rung hapoh ka EC” ong u bah Pynshngaiñ.
Katkum ka jingong jong u u la ong ba ka jingdonlang ki Khlieh Nongsynshar ka long ba kin ai jingmut kiei ki bynta kiba hap ban leh na ka bynta ban iada kyrpang ia ka riti ka dustur. U la ai jingmut ruh ba donkam ia ki Dorbar Shnong , Dorbar Raid bad Dorbar Hima ba kin thaw ia ka thup kyrteng thep vote jong ki khnang ba ki lah ban phah ia ki nongmih khmat jong ki sha ka Federation of Traditional Dorbar kaba la thaw ha ka Dorbah ha madan Polo ha ka 5 tarik u nailur. U la ong ba ka EC ka dang pyrkhat ban thaw dur ia ka FTD khnang ba kan lah ban pynmih ia a thup kyrteng jong ka ha manla ki shnong ba ki shnong kin phah ia ki nongmihkhmat jong ki. “Ka jingdon jong ki nongmihkhmat na ki Dorbar Shnong, dorbar Raid, Dorbar Hima kan pyrkhing ruh ia ka rukom treikam ka EC ha kaba ka EC kan ym lah ban leh ia ki kam katba ka mon” u la ong biang.
Katkum ka jingkren jong u u la ong ba ka jingdon jong ka FTD kan weng noh ia baroh ki jingartatien bad ki jingsuba sniew halor kino kino ki rai ba la shim ka EC namar ba ki Khlieh nongsynshar ruh ki don bynta lang ha ka ban shim rai. “Ka por ka la dawa tyngeh ba ngin ia tylli kawei mlon ban ia khun ia ka jingshah wan tyllep ha ki Aiñ kiba na bar la ka dei na ka sorkar jylla ne sorkar pdeng” ong biang u bah Pynshngaiñ.