Shillong: Ka All Meghalaya SSA School Teachers Association (AMSSASTA) ka la leit ban ia kynduh ia u myntri ka pule puthi (Education Minister) u Lakmen Rymbui myn ha ka 18 tarik mynta u bnai ban dawa na u ban pyllait kloi ia ka tulop ki nonghikai SSA kaba saw bnai naduh u Nailur haduh Nohprah mynta u snem. Ka Association ka dawa ba dei ban pyllait noh shuwa ka jing rakhe kristmas. Ha kaba iadei bad kane ha ka 19 tarik mynta u bnai ka AMSSASTA ha ryngkat ka jingiadon lang u Stickson Sangma President ka AGHSSASTA ki la leit iakynduh ruh ia u Ambrose Marak uba dei u State Project Director (SPD) ban wad jingtip halor ka jingslem jong ka tulop. Na ka liang jong u la iathuh ba un sa leh katba lah ban pyllait ia ka shuwa ka kristmas bad yn pyllait ia ka tulop katkum ka jingdon pisa naba ka sorkar kam pat ioh ia ka pisa na ka sorkar pdeng.