Shillong: U Conrad Sangma, myntri rangbah ka Jylla, mynta ka sngi, ula pynsngew ba un wad jingtip kaba shai halor ka jingjia jong ka jingduh jing julor jong ka iingmane ha Qualapatty, kaba la shim ruh ia ar ki mynsiem briew bad ia uwei u ksew.
Ka jingkwah jong U Sangma, ban tohkit, ka dei halor ka jing kynnoh ia ka jingslem jong ki pulit pynlip ding, ban poi sha katei ka jaka, ong ka khubor.
“Lada ka don kano kano ka jingleh sting, kumta, ka dei ban don ka jingtohkit kaba stet bha. La iathuh ia nga da ka Deputy Commissioner, East Khasi Hills, ba ka don ka jingkynnoh, ba yn jin da la lah ban kiar na katei ka jingjia kaba jur shi katdei, lada ki pulit pynlip ding ki wan ha ka por kaba biang. Ngan sa wad jingtip kaba shai, namar ba katei ka dei ka kam kaba khia shi katdei” ong U Sangma, haba kren sha ki kotkhubor, haba leit jngoh ia katei ka iingmane kaba la ingkhong ha Qualapatty.
Na ka liang U Bah Martamlin Pyrbot Rangbah Shnong ka Qualapatty, ula kynnoh ba ka jingiap jong ki arngut ki briew, ka dei namar ba ka jingslem eh jong ki pulit pynlip ding bad ula ong shuh shuh “Ngin khot jingialang noh hapoh ka shitaiew ban iakren halor kane ka mat bad ba kan nym mih kano kano ka jingjia kaba sniew hadien ha bud bad ban iohi ba ki kam jong ka sorkar, ki dei ban wan beh, haba don ka jing donkam jong u paidbah”.
Na ka liang U Conrad, ula ong shuh shuh ba ula wan peit dalade ia ka iingmane bad ka dei ka jingjia kaba i sangsot shi katdei bad ka jingduh, kam dei tang ia ka balang, hynrei ka dei ia ka nongbah Shillong bad ia ka jylla hi baroh kawei. U Sangma, ula ia kynduh ruh ia ki trai iing kiba don jingiadei bad kitei ki arngut kiba iap.
Phi don ban ong eiei?