Shillong:Ka Hynniewtrep Youth Council lyngba ka Sohra Circle bad Ri- War Shella Circle, ka pynpaw ia ka jingkyrshan ia ka jingkren u Lamphang ka Ing Dorbar Thaw Ain ka Jylla uba long ruh u Nongmihkhmat Ka Shella Konstitwensi U Dr Donkupar Roy ba ka Sohra Sub-Division, ka la long kaba biang palat ban kyntiew noh ia ka sha ka District ba pura na kaba long Sub- District mynta.
Ha ki snem kiba lahdep ka lahdon ka jingdawa na kiba bun ban kyntiew noh ia ka Sohra Sub-Division sha ka Distrik ba pura, hynrei ym lah ban tip na kino ki daw ym shym la lah ban pynurlong ia kane.
Kumta na ka liang ka Seng ka dawa na kane ka Sorkar ba mynta hapoh ka jingialam u Conrad Sangma, Myntri Rangbah ka Jylla ba ka dei ban kyntiew noh ia ka Sohra Sub-Division Division sha ka Distrik ba pura ban kynthup ia Sohra bad Shella Konstitwensi khnang ba kan long ka jingiarap ia ki paidnongshong shnong kane ka Thain bad ruh ban kham wanrah shuh shuh ia ka jingiajan ha ka jingiadei kam ki tnat treikam ka Sorkar bad ki Paidbah.
Ka Seng kan sa lum noh shen ha kine ki sngi ia ki Nongialam Shnong, ki riew rangbah bad riew pawkhmat ka dong ka thain ban ia treilang na ka bynta ban pynurlong ia kane ka jingangnud jong ki paidbah jong ka Thain hi baroh kawei.Ka Seng ka shim ruh kane ka kabu ban kyntu ia ki Nongmihkhmat jong ka Shella bad Sohra Konstitwensi kiba don bynta lang ha ka Sorkar synroplang kaba mynta ba kin shim ia ka jingkitkhlieh ban pynurlong ia kane ka kam, ong ka kyrwoh na U bah Roy Kupar Synrem, President bad U bah Shan Nongrum President Riwar Shella Circle.