Kwah rung BJP U Bah Dip & U Prof Don

Shillong 08 Naiwieng:
U MLA barim ka UDP na Nongspung u Bah John Antonio Lyngdoh (Bah Dip) u la pynpaw ba u la kwah ban iasoh noh bad ka BJP kum u dkhot na North Shillong mandal katba u Prof Donkupar War uba la risain na ka shuki Vice President ka MPCC, u la pyntip sha ka BJP ba um don shuh bad ka Congress.
Ia kane la iathuh da u President ka BJP u Bah Shibun Lyngdoh haba iakren mynta ka sngi. U Bah Dip bad u Prof War ki dei ki riew rangbah kiba don ha kajuh ka konstitwensi ka North Shillong, kiba la phet noh na ki party jongki.
“U Bah Dip u la phah jingtip ba u la kwah ban rung BJP noh hynrei namar ba ka BJP kam pat don Mandal na North Shillong, ka jingiapynbeit ka dang iaid mynta na kaei ka unit un rung”, la ong u Bah Shibun.
U la ong ba na ka liang ka BJP ka sngew tynnad ban pdiang ia u kum uwei na ki nongialam ba long MLA barim ban iasoh sha ka party.
Katba ia u Prof War, u president ka BJP, u la ong ba u la phah jingtip sha ka party ia ka jingrisain jong u na ka Congress hynrei kam pat don ka jingiakren ba u kwah ne em ban rung bad ka BJP.
“Lada u wan, ka jingkhang ka plie beit kum ka party”, la ong u Bah Shibun bad bynrap, ba ‘haduh mynta kam pat don ka jingiakren bad u Prof War ba un rung ne em”. Katkum ka jingtip, u Bah Dip u la thrang ban iakhun na ka BJP na North Shillong hadien ba u la risain noh na ka UDP ban nym leit iakhun shuh na Nongspung konstitwensi kaba u la jop teng ar sien ha ki snem ba la dep.