Kwah pynneh shwa ia u DC WJH

Jowai, 17Jylliew:
Ki ar tylli ki seng bhalang ha ri lum Jaintia Hills, ka Jaintia Youth Federation (JYF) bad ka Hynniewtrep National People’s Federation (HN PF) ki la kyntu jur ia ka sorkar jylla ban pynneh shwa ia u Deputy Commissioner ka West Jaintia Hills na ka bynta ka jingmyntoi ka District.
Ka Jaintia Youth Federation (JYF) ka la pynpaw ia ka jingsngew khia halor ka jingshah pynkynriah u Deputy Commissioner ka West Jaintia Hills District, u bah Peter S Dkhar.
Na ka liang ka JYF ka la pynpaw ba ka rai jong ka sorkar ban pynkynriah noh ia u bah Dkhar na West Jaintia Hills ka long ka jingduh kaba khraw iaka District namar ba udei uwei na ki heh District uba trei shitom ban wanrah ia ka roi ka par bad ruh uba trei shitom ban pynneh pynsah iaka shongsuk shongsain ha ka District.
“U bah PS DKhar u dei ruh u heh ka District uba lah ban pyniadei bad ki riew paidbah khlem da don kano kano ka jinglehshilliang”, la ong u President ka JYF, u Poipynhun Majaw.
Na ka liang ka JYF bad HNPF shen kan sa phah ia ka dorkhas sha ka sorkar jylla halor kane bad ka buh ruh ka jingkyntu ia ki nongmih khmat ka West Jaintia Hills kiba kynthup ia u ma Sniawbhalang Dhar, u ma Robinus Syngkon, ia u ma Coming Ymbon bad khamtam eh ia u Deputy Chief Minister, u Proof. RC Laloo ban kyntu ia ka sorkar ban pynneh shwa ia u bah PS Dkhar kum u DC ka West Jaintia Hills District.