Shillong: Ka 6 shnong Wah Lukha Association ryngkat ka jing synran lang u MDC ka Narpuh Bah Emlangky Lamare ha ka sngi balang ba ladep, ka la ia kynduh ia u Chief Executive Member (CEM) jong ka Jaintia Hills Autonomous District Council (JHADC), U Ma Thombor Shiwat na ka bynta ban kyrpad ia u ban nym die lilam shuh ia ka Wah Lukha sha ki riew shimet kumba juh leh man la u snem bad la kyrpad ruh ia u ban ai pyniaid noh ia kane ka wah sha ki 6 tylli ki shnong kiba shong ba sah harud jong kane ka wah hapoh ka jing peit jong ka Association. Hynrei na ka liang U CEM u la ong ba kin hap ban ia kren ha ka Executive Committee halor kane ka jingdawa jong ka 6 shnong.
Na ka liang jong u Secretary ka 6 Shnong Wah Lukha Association Bah Daiapherbha Lamare, u la batai shai ha khmat u CEM ka JHADC ba ki briew kiba shong ba sah harud kane ka Wah ki long kiba duk kiba rangli, bun ki im bylla da kaba khwai dohkha na kane ka wah ban pyndap pynbiang ia ka iing ka sem jong ki bad u la ong ruh lada ka JHADC ka die lilam lane nym die lilam ruh ia kane ka wah kam don jingktah ia ka pisa mang tyngka jong ka JHADC namar ka die lilam ia ka ha ka dor T.1,50,000 shisnem hynrei lada yn ai ia kane ka wah sha ki 6 shnong katno ka long ka jingkyrkhu ia ki briew kiba shong ba sah harud kane ka wah Lukha.
U Bah Lamare u la batai shuh shuh ba ka Association ka don jingthmu ban pynlong ia kane ka wah kum kawei ka jaka jngohkai pyrthei hapoh Meghalaya, khnang ba ki briew kin ioh kam ioh jam da ka kam jngoh kai pyrthei bad ka don jingthmu ruh ban pynkhuid ban pynbha bad ban pyntikna ba kane ka wah kam kylla rong blue shuh kum ha ki snem ba la dep.
Ka Association ka kynthup ia ki 6 tylli ki shnong ka Sonapyrdi, Sakhri, Lum Tongseng, Shymplong, Borsora bad ka Kuliang kiba don harud kane ka Wah Lukha kaba don hapoh ka Elaka Narpuh.
Ha kajuh ka por ka Association ka kloi ruh ban iarap ia ka Council kumno ban kyntiew ia ka jingioh jong ka lyngba kane ka wah Lukha.
Phi don ban ong eiei?