Kwah kynduh ka ADM, ia ki briew, ba iohi ia ka jingjia iakulmar ha jaka khwai ha Nongbah Myrdon

Nongpoh: Ka Kong F.M Lakiang, Additional District Magistrate, Ri Bhoi District, Nongpoh, ka la pynbna paidbah ba kino kino ki briew kiba la iohi markhmat, halor ka jingjia iakulmar, kaba la jia mynha ka 9 tarik mynta u bnai ha ka jaka iakop khwai Dohkha ha shnong Nongbah Myrdon, ba kin sngewbha ban leit kynduh ia ka, na ka bynta ban kin iathuh halor katei ka jingjia kaba la jia ha katei ka sngi.

Ka ADM Ri Bhoi ka la kyrpad ia kino kino ki briew, kiba la iohi markhmat halor katei ka jingjia, ba kin sngewbha ban kynduh markhmat ia ka ha ka 25 tarik mynta u Bnai, kata ha ki kynta treikam ka ophis, khnang ba ki briew ka ain kin ioh ban shim jingtip na kiba kum kita ki briew kiba iohi markhmat halor katei ka jingjia.