Kwah ki 21, 500 ngut da ka jingiop, ai ka Lajong da ka iakhaid

Shillong, 29 Nailur:
Ki paidbah kiba ju ieit ia kaj ingialehkai phutbol khamtam ki nongkyrshan ba shit rhem jong ka Shillong Lajong Football Club (SLFC), mynta ka sngi ki la ap khmih lynti dik dik da u soh jong ka jingjop pyrshah ia ka Pune Football Club, hynrei ka SLFC, ka la ai pat ia ki arphew wei hajar hajar sanspah (21,500) ngut da ka jingiakhaid.
Wat hapdeng u slap uba la pynthut ia ka leit ka wan jong ki paidbah, hynrei kine ki phew hajar ngut ki nongkyrshan jong ka Shillong Lajong ki la poi shuwa ka por ban sdang ka jingialehkai kaba la buh ban long ha ka por 3.30 baje janmiet ha madan Jawaharlal Nehru Sport Complex, Polo Shillong pyrshah ia ka Pune Football Club.
Ki paidbah kiba la ap kmih lynti ban sdang noh ka jingialehkai ki la lyngngoh ba ym shym la sdang satia ha ka por kaba la buh kata ha ka por 3.30 baje janmiet ha kaba ki la sdang ban hylla bad kyrkait, hynrei kham hadien ki bor pyniaid phutbul ki la pyntip ba ka jingialehkai kan sdang noh ha ka por 4.15 janmiet.
Kham hadien la pynmeh ia ki light kiba pynshai ia ka madan baroh kawei bad ka jingialehkai ka la sdang ha ka por 4.45 baje janmiet ha ryngkat ka jingpynshai ia ki light.
Mar iasdang ka jingialehkai ki paidbah ki la kynhoi bad pyrta jam bha bad kine ki nongkyrshan ki da pynpaw ia ka jingkwah eh dik dik ba ka Lajong kan jop bad ki don ruh ka jingkyrmen ba kan jop khamtam hadien ba la ioh ia ka khubor ha ka jingialehkai kaba nyngkong ba ka la pynliem pyrshah ia ka klob radbah kaba na Goa 3-0 kl shabar na la iing.
Ha ka jingialehkai jong ka kylla step ka lajong ka la kham ioh ia ki kabu ban thep kol, hynrei kam shym la ioh satia ban pynkhih ia ka jar bad na ka liang jong ka Pune ruh ka la pyrshang hi ban ioh thep kol, hynrei kam shym la iohlad satia.
Ka jingialehkai kam da long than kaba sted bad kine baroh ar tylli ki team ki long kiba iabiang bor ha ka jingialehkai, hynrei ka Lajong ka la kham ioh ia ki kabu ban thep kol tangba kam shym la lah satia ban pynkhih ia ka jar.
Haba phai sha ka jingialehkai jong ka Pune, la iohi ba ka kham biang ha ka rukom ia pashad ia ka bol, hynrei haba phai sha pat sha ki kabu thep kol kam da iohlad satia ban ioh ia ki kabu kiba biang.
Kumta ka jingialehkai mynta ka sngi hapdeng ka Lajong bad ka Pune ka la kut noh ha ka jingiakhaid ha kaba ki la iasam noh mar shi point bad kine baroh 2 tylli ki team haduh mynta ki la kamai mar 4 point.