Kwah ki 14 Sengbhalang, ban weng ia U Naik kum u khlieh elekshon

Shillong,8 Naiwieng:
Ki 14 tylli ki sengbha lang kiba kynthup ia ka KSU,FKJGP,HNYF, GSU,JSU, RBYF,JYF, CSWO, KWADDA, AJY WO, AYWO, ADE,AIGU bad FAF mynta ka kynti ki la ther tyngeh sa ia ka jingpynrung kyrteng ia ki bar jylla hapoh ki kyrteng thep vote ha kane ka jylla.
Ha ka jingpynmih kyrwoh lyngba U bah Daniel Khyriem, u President ka KSU, la kynnoh ba bunsien hi la ju iohi ba ka tnad elekshon ka dei ka shlem pynroi ia ki bar jylla ha kane ka jylla bad la ther ruh ba kane ka jingjia ka la jia namar dei tang ka jingleh jong uwei u briew uba ki sengbhalang ki la ju lap ba u dei u juh hi u briew uba don ia katei ka jingthmu “U P Naik”
“La kynnoh da kitei ki seng bhalang, ba na ka por sha ka por U Naik, u ju thmu ban pynbun shuh shuh ia ki bar jylla ban iohrung ha ka Electoral Roll jong ka jylla” ong ka kyrwoh na u Bah Daniel Khyriem uba la ther tyngeh ia utei u khliehduh ka tnad elekshon ha jylla, u Chief Electoral Officer.
“Ngi ki 14 seng, ngi sngew ba ngim donkam shuh ia une u briew ba un dang long kum u khlieh u ban peit ia ka tnad election ha ka jylla jong ngi bad ngi khmih lynti ba ki bor ba halor bad ka sorkar jylla ka dei ban shimkhia bad ka dei ban shim ia ka jingkitkhlieh bad ngim kwah ba une ujuh u briew un dang bteng ban shakri ia kane ka kam bad ngi kwah ban don noh da u briew lajong uba sngewthuh ia ka jingeh, ka khia ka shon jong ka jaidbynriew bad ka jylla hi baroh kawei” ong shuh shuh ka kyrwoh.
Shuh shuh ki 14 seng ki la kyntu ia ki dorbar shnong ba kin shimkhia ban ym ailad ia ka jingioh lad ki briew ba na bar ban pynrung kyrteng ha ka thup thep vote, bad ban bud ia ka nuksa ba ka Dorbar shnong Madanriting ka la leh. Ki 14 seng ki la pynrem jur ia katei ka jingthmu ban pynrung kyrteng thep vote ia ki bar jylla ha kane ka jylla.