Kwah ka UDP ia ka rel, tang ban kit mar, “Ym ban kit briew”

Shillong, 13 Rymphang:
Ka United Democratic Party (UDP) ka la ong ba ka kwah ba ka lynti rel kan wan sha kane ka jylla tangba kam dei ban kit briew hynrei tang ban kit ia ki mar ki mata.
U Vice President ka UDP u Bah Allantry F DKhar u la ong ba ka UDP ka pdiang sngewbha ban wan ka rel kit jingkit haduh Byrnihat ka Ri Bhoi hynrei kam kwah ia ka rel ban kit briew.
Ka sorkar pdeng ka la kwah ban pyniasoh ia ka Meghalaya da ka lynti haduh Byrnhhat na Tetelia kaba 22 km bad ruh haduh Shillong.
Ia ka lynti rel na Tetelia sha Byrnihat la mang pisa T. 496 klur. Hynrei ka sahteng noh hadien ba ka la don ka jingpyrshah na ki sengbhalang halor ka jingtieng ba kan wanrah ia ka jingwan tyllep da ki briew ba nabar.
“Kaba bha ban pyrshang ia ka rel ban kit ia ki mar ki mata haduh Byrnihat. Kane kan long kum ka jingpyrshang ban peit thuh la ka jingwanrah lynti kan ktah ne em ia ka jingwan buhai shnong ki briew nabar’, la ong u Bah Dkhar. Ka UDP ka sngew ba ka jingpdiang ia ka rel ban kit ia ki mar ki mata, kan pynsuk bad kan pyntad ia ki mar ban ia kaba kit da ki kali.
Ka la ong ruh ba ka jingpyniaid ia ka lynti rel haduh Shillong ym tang ba kan ktah na ka jingwan kharoi ki briew nabar hynrei kan ktah ruh ia ka jingpynjulor ia ka mariang.
U la ong ba lada wanrah ia ka lynti rel khlem ki lynti ba biang ban tehlakam ia ka jingwan ki briew nabar, kan ktah ia ka jylla bad khamtam ia ka nongbah kaba la khapngiah lypa, la ong u Bah Dkhar.