Kwah ka UDP ban synshar marwei ha KHADC, khlem ka Congress

Shillong, 27 Nohprah:
Ka UDP ka kwah ban synshar marwei hi ha KHADC da ka jingkyrshan jong ki MDC shimet hynrei ka la ong ba kam kwah ban ia donlang ha ka juh ka Executive Committee bad ka seng Congress. Katkum ka khubor ba la ioh lum la iathuh ba ka UDP ia mynta ka don kumba 6 ngut ha KHADC hynrei ka dang ap ia ka jingkyrshan jong kiwei pat ki MDC shimet ban ioh ia ka bor synshar bad la iathuh ruh ba ki la don katto katne ngut ki MDC ha KHADC kiba la ia sngewthuh jingmut bad ka seng UDP hynrtei ki dang ap ban ioh ia ka jingbun briew bad bat ia ka bor synshar.
Shuh shuh ki tyllong khubor ba la ioh lum la iathuh ba ka seng UDP kam don jingmut ban ia treilang bad ka seng Congress ha KHADC ban ia donlang ha ka juh ka EC hynrei kan pdiang pat lada ka seng Congress kan kyrshan ban pynkhyllem ia u bah Pynshngaiñ N Syiem. La sngewthuh na ka jingiakren bad ki heh UDP ba ka u kyrtong CEM jong ki mynta ka kynti un dei u bah H.S Shylla u MDC ka Nongkrem u ba dang shu jop shen ha ka elekshon shiteng samoi.