Shillong: U Myntri Rangbah ka jylla u Conrad K Sangma myn hynninka sngi, u la hiar sha ophis ka MeECL ha Lumjingshai, Shillong ha kaba u la lum jingialang ia ki ophisar kane ka kompeni sorkar, ban bishar ia ka jingiaid ki kam ki jam jong kane ka kompeni.
Ha kane ka jingialang, la iakren ia ka jingdap ram ka MeECL bad kumno ban thaw lad ban pynduna ia kane ka jingeh ba ka MeECL kaba shem ia shibun ki jingeh.
“Ngi la iakren ia baroh lai tylli ki tnad naduh ka Generation, Transmission bad Distribution”, la ong u Conrad.
Katkum ka jingong u myntri rangbah, la iakren ruh kumno ban pynduna ia ka jingpynlip ding, ban pyndonkam da ki bor ka mariang ban pynmih ding bad kiwei.
“La iakren ruh ia ka jingduhnong na ka jingbym biang ka rukom lum ia ki bai thang ding, bad kumno ban pynbha ia ka”, u la ong. La ia kren ruh ha katei ka jingialang, halor ka jing duhnong jong ka MeECL, na ka jingthaw bai ding, ha ka dor kaba duna bad la ai jingmut ban pyndonkam noh nangne shakhmat, da ki meter kiba hap siew pisa lypa.
Ka jingialang ka la iatai ruh ban pynlong ia ka jingpynshai paidbah shaphang ka jingdonkam ban lait na ka jingpynlut phut ia ka ding da kaba pyndonkam da ki bulb LED, da ki ding sngi bad kiwei.
La iakren ruh ia ka Subhagya Prokram kaba dei ka prokam ai ding ei ia ki nongkyndong ba duk, bym pat ioh ding bad ka jingpyntreikam ia ki kam ban pynmih bording kynthup kiba rit bad kiba heh.
“Kane ka dei ka jingialang kaba nyngkong, lashem bnai ngan lum biang ka jingialang ban iakren bniah ia ka jingduh nong ka kompeni”, la ong u Conrad.
Phi don ban ong eiei?