Kwah ka sorkar ban pynsted ia ka surok Shillong-Dawki

Shillong 27, Risaw:
Ka sorkar jylla ka la kwah ba ka surok Two Lane na Shillong sha Dawki ban pynsted khnang ban pynsuk ia ka leit ka wan jong ki paidbah. Ia kane ka surok ba la mang. T 1251 klur na ka bynta 71.5 km, la sdang ban iaid shaid shaid ban thew ia ki jaka ban shim na ka bynta kane ka jingthmu ban sa pyntreikam da ka kompeni na ri Japan ka Japanese International Cooperation Agency (JICA) lada ka treh, kaban shna ruh ia ka jingkieng Dawki ha Wah Umngot.
Kane ka kompeni khaduh mynta kam pat rai ban shimti ban pyntrei ia kane ka surok namar ba ia mynta ka dang pule bniah shwa ia ka jingwad bad surbe jongka, ia kane ka surok. U myntri ka tnad PWD u MM Danggo hynne ka sngi u la khot jingialang bad ki heh kane ka kompeni JICA ba la don lang u myntri ka PHE Bah Prestone Tynsong, u myntri sor u Bah Ronnie V Lyngdoh bad ki heh ka NHIDCL.
“Da ka jingiatreilang jong ki paidbah, ki nongmihkhmat paidbah jong ki thain, ngin sa lah ban pynbeit noh ia ka jingshim jaka ban shna ia kane ka surok”, la ong u Danggo. U myntri ka PWD u la ong ba ki bor shipai ki la pynpaw ruh iaka jingkloi ban ai jaka ban shna ia kane ka surok, hadien ba la iakren bad ki heh ka National Highways and Infrastructure Development Corporation Limited (NHIDCL).
U la ong ba na Umshyrpi sha Hynniewmer yn shna da ka Four Lane katba kaba sah yn shna da ka Two Lane kata naduh Mylliem sha Dawki-Tamabil.
U la ong ba yn shna ruh ia ka lynti suin ne flyover ha Umshyrpi ha kaba ka KHADC ruh ka la pdiang ban ai no objection certificate (NOC).
U la ong ba ka jingkieng Dawki ha wah Umngot yn shna kaban Two Lane namar ba kane ka jingkieng ka la rim bha ba la shna naduh u snem 1932, kaba jrong 368 meter . Ia mynta ka sorkar ka dang pynkhreh ia ka detailed project report (DPR) bad hadien ba la pdiang kan sa shim jaka bad la buh thong ban pyndep ia kane ka kam hapoh lai snem.
Katba u Nakamura Jun na JICA u la ong ba ka JICA kam pat rai la kan leh ne em namar ba ka dang pule bniah ia ka rukom bei pisa, la ka long kaba lah ne em. “Ka JICA kam pat rai halor kane, ka dang pule bniah ia ka”, la ong u Jun. U la ong ba u la don lai bnai ban pule ban surbe ia kane ka surok ha kane ka jylla.