Kwah ka seng nongrep, ban plie noh ia ka Iewduh

Shillong: Ka seng ki nongrep, ka Khasi Jaintia Farmers’ Association (KJFA), ka la kyrpad jur ia ka sorkar MDA ba kan pynjynsur noh ia ka por pyllait Korphiw ha baroh kawei ka sor Shillong, la kumno kumno na ka lai kynta sha ka hynriew kynta, kata naduh ka por 9 baje mynstep haduh ka por 3 baje nohphai sngi, khnang ba ki paidbah nongrep na ki jaka kyndong kin ioh ban wan die ia ki mar-rep bad ban ioh thied ia kiwei kiwei ki jingdonkam jong ki nongrep na Iewduh bad na kiwei kiwei ki jaka jong ka sor.

Ki nongrep ki la lynga bad khuslai mynsiem haduh katta katta namar la khang lad ia ki ban wan ha Shillong haduh jan dap shi taiew, bad bun na ki mar-rep ki la julor ei. Kane ka la ktah jur ia ka im ka iap jong ki, namar ki wan die bad wan thied rwing tang ban ioh khaw bad jyntah ki khun.

Ka seng ka la ud ruh hakhmat ka D.C jong ka East Khasi Hills, ba kum ka ophisar rangbah kaba sngewthuh bha ia ka jingeh jong ki paidbah, khamtam jong ki nongkyndong, ba kan pyllait jynsur ia ka korphiw, khnang ba ki paidbah nongrep bad ki nongkyndong kin ioh ban pyndep ia la ki jong ki jong ki kam ha sor Shillong. Ka seng ka ngeit skhem ba ki bor sorkar kin sngap lem ia kane ka jingud jong ki, ong ka khubor na U Bah Philip Marwein, Acting General Secretary jong ka seng nongrep KJFA.