Shillong:Hadien ba ka mat khlong Uranium hapoh ka Jylla ka la pjah namar ba ka Sorkar Meghalaya bad ka Khasi Hills Autonomous District Council (KHADC) ki la dep khylliap noh ia ka lynnong jong ka kam tih Uranium, hynrei la mih kynsan kawei ka kynhun ba kam ba ka dei ka seng treimonsngewbha na Nongkrem, kaba la phah dorkhas sha ka Sorkar India da kaba kyntu ban pynim biang ia ka jingthmu khlong ia Uranium hapoh ka Jylla Meghalaya.
Kane ka seng ka dei kaba la tip da ka North East Sunshine Trust (India) kaba la register ha Shillong ha u snem 2022 bad kaba ai jaka treikam ha ‘Kensington, Kynton-U Mon, Lad Nongkrem. Ia kane ka dorkhast ba ka NEST ka la phah la soi da kawei ka longkmie kaba la ai kyrteng da ka Kong Elizabeth Mathew Nongbri kaba kam ba ka dei ka Founder Trustee bad Chairperson. Ia kane ka dorkhast ka la phah sha u Dr Jitendra Singh, Myntri Khynnah ka Department of Atomic Energy, ka Sorkar India ban kyrpad pynim biang ia ka kam tih Uranium ha Meghalaya. Kane ka dorkhas bala ioh copy da ka dei kaba la phah ha ka 26 tarik u Rymphang, 2024.
Kat kum kane ka dorkhas, ka Kong Elizabeth Nongbri, ka la pynithuh ialade ba ka dei ka Khasi bad ka dei ka nongtreikam jong ka BJP naduh u snem 2015. Ka la pynithuh ruh ba ka dei kaba iohlok shipai bad ba ka la bat ia ki kam ba kongsan hapoh ka BJP Minority Morcha bad ruh kum ka National Executive Member.
Ka la pyntip ba ha u Naiwieng 2023, ha ka Ex-Servicemen Convention ha Kurushetra, ka la iakynduh ia u Col Pravat Kumar Panda (retd) uba dei u Independent Director ka Uranium Corporation of India Limited (UCIL) bad une ula kren halor ka jingpynim pat ia ka kam tih uranium ha Meghalaya.
Haba pyntip ba u Uranium, u don kyrhai hapoh West Khasi Hills, ka kong Elizabeth kala iathuh ba ka NEST(India) kaba don ki briew ba ithuh ithaw ha ki shnong ki thaw bad ki stad ki jhad ban tih marpoh khyndew, ka lah ban pynurlong ia ka kam tih Uranium hapoh ka Jylla Meghalaya, kaba la pynduh pyndam ha u snem 2016 hadien ba ka Sorkar Jylla ka la pynkut noh ban ai jingbit ban shim wai ia ki jaka ha West Khasi Hills bala iateh kular hapdeng ka Sorkar Pdeng bad Sorkar Jylla ha u snem 2009.
Lah ban pynkynmaw ba ia ka jingthmu khlong ia u Uranium da ka UCIL la pyrshah jur ruh da kiba bun ki kynhun sengbhalang kiba don hapoh ka Jylla, kum ka KSU, FKJGP, HNYF, HYC bad kiwei, kaba la pynlong ia ka Sorkar Jylla bad kumjuh ia ka district council ban pynkut noh ia kane ka lynnong tih Uranium na kane ka Jylla, hynrei kyndit kynsan mynta ka sngi la paw pyrthei pat kane ka dorkhas jong ka NEST kaba lah ban ktah ia ka jingsngew ki nongshong shnong trai Jylla.
Phi don ban ong eiei?