Kwah ka kong Ampareen ban pynthaba ia ka Shillong

Shillong,25 Risaw:
Ka Myntri ka tnad kam sor ka jylla ka kong Ampareen Lyngdoh, ka la kyntu ia ki wei pat ki nongmihkhmat jong ki konstitwensi bapher bapher ka nongbah Shillong ba kin pynmih pisa na ki skhim bapher bapher jong kin a ka bynta ban pynthaba ia ka sor Shillong da kaba buh ia ki jingpynthaba ding ha manla ki rud surok. Ka la ong ba kiwei pat ki nongmihkhmat ki lah ban iarap ia ka tnad Urban da kaba pyni ia ki jaka ba I donkam ban buh ia kitei ki Street light ha ki konstitwensi jong ki.
Ka Myntri ka tnad pynroi sor ka jylla ka la iathuh ba ka tnad Urban ka la dep buh ia ki LED light ha kiba bun ki jaka kiba ha kine ki khyndiat snem ba la dep ki dei ki jaka kiba dum, ka la ong ruh ba katei ka jingpynthaba ia ka sor kan iarap ban pyntieng ia ki runar kiba thmu ban leh ia ki kam pyntriem.
Haba kren halor katei ka phang ka kong Ampareen ka la pynpaw ia ka jingsngewsih halor ka jingbym khein snep ki riew shim kabu ia ki tiar paidbah da kaba pynduh pynpait ia ki street light hynrei ka la maham da kaba ong ba mynta ka tnad Urban kan peitngor bha ia kiba kum kitei ki jingleh. “Ia mynta hi ka tnad Urban kan kham pynleit jingmut shuwa sha kito ki jaka ki bym hap hapoh ka Municipal ban buh street light” ong ka kong Ampareen.