Kwah ka KHADC ban wanrah Para 12B, kyntait ba mynjur lynti rel

Shillong, 30 Jymmang:
Mynta ka sngi ka la don ka jingialang jong ka People’s Democratic Forum (PDF) kaba bat ia ka bor synshar ha KHADC. Haba kren sha ki nongthohkhubor hadien ba la wai katei ka jingialang u CEM ka KHADC u bah Pynshngaiñ N Syiem u la ong ba katei ka jingialang ka la rai ban tyrwa sha ka sorkar pdeng lyngba ka Proposed Amendment Act jong ka 6th Schedule ban pynneh biang ia ki sobjek jong ka Para 12B ka Paragraph 3 ban ai bor ha u Lat ka jylla ban pynmih ia ka hukum ba ki aiñ jong ka sorkar pdeng kin nym lah ban treikam ha ka jylla.
U la ong ba ha u snem 1966 ha ka por ba ka jylla ka dang hap ha ka Assam u Lat ka jylla Assam u la pyllait noh ia ka Limitation Act jong ka sorkar kmie tang da kaba pynmih tang kawei ka hukum hynrei ha u snem 1972 la pynduh noh ia kane bad la wanrah da ka 12 (a) B kaba kdew ba dei tang u President ka Ri u ba lah ban pynmih ia ka hukum ba ki aiñ ka sorkar pdeng kin nym treikam ha ki jylla.
Ha kawei pat ka liang u CEM u la ong ba ka District Council kam shym la ai NOC ban shna lynti rel ha ka jylla bad katei ka dei kaba u kynmaw ba hadien u snem 2013 kam shym la don kano kano ka jingai NOC hynrei u dang hap pat ban peit bniah ioh ka don ka jingai NOC shuwa u 2013.
U la ong ba ka tnad ba peit ia ka lynti rel ka la pan NOC na ka KHADC dei tad hadien ba la mih ka aiñ  Right to Fair Compensation and Transparency in Land Acquisition, Rehabilitation and Resettlement act, 2013. Ha kaba iadei bad ka jingkam u DC ka Nongpoh ba ym donkam ban shim iaka NOC na ka KHADC, u Bah PN Syiem ula ong ba ka don kawei ka kyndon ain (section) katkum ka Right to Fair Compensation and Transparency in Land Acquisition, Rehabilitation and Resettlement act, 2013 lah ban iaid shakhmat bad kino kino ki project kiba kham kongsan na ka bynta ka jingdonkam u paidbah khlem da donkam ban ioh iaka NOC bad ula ong ruh ba um pat kwah ban kren eiei than halor kane ka bynta hynrei katkum ka jingsngewthuh ka jongu katba ki jaka ki dang hap hapoh ka Sixth Schedule ki donkam ban ioh jingbit na ka council.