Kwah ka Congress, UDP ia u bah Pyniaid

Shillong, 13 Rymphang:
La ioh jingtip ba ka seng Congress bad ka seng UDP ki kwah ban tan ia u MDC ka Sohryngkham u bah Pyniaid Sing Syiem sha ka seng jong ki bad la ong ba ki la kular ruh ba lada u wan pyniasoh kin ai ia ka tiket ha ka elekshon MLA 2018. Ki lad khubor ki la iathuh ba ka seng Congress kumjuh ka seng UDP ki la phah ia ki ksiang jong ki ban leit ia kren bad utei u MDC ba shah sospon ha ka seng HSPDP.
La pyrshang ban ia kren bad u bah Pyniaid ha kaba u la ong ba ha shuwa ba un shim ia kano kano ka rai bad shuwa ban pyniasoh bad kano kano ka seng u hap ban pan jingbit shuwa na ki paidbah kiba dei ki nongkyrshan radbah jong u. U la iathuh ruh ba naduh ba u la shah beh seng um pat don jingpyrkhat ban leit ia soh bad kano kano ka seng ruh hynrei u dang bunkam ban ia shong pyrkhat bad ki paidbah nongkyrshan. Kiwei pat ki lad khubor ki la iathuh ba u bah Pyniaid u kwah ban ia soh bad ka seng riewlum bad la ong ba u kham shon jingmut ha ka UDP napdeng ki seng riewlum kiba don ha kane ka jylla.