Kwah ka BSNL ban buh CAPF

Shillong, 19 Nailur:
Ka General Manager ba thymmai jong ka BSNL Shillong Circle, ka Tota Anila Kiran, ka la ong ba ki la dep pan jingbit na ka tnad kampoh iing jong ka sorkar pdeng ban buh ia ki phone Central Arms Police Force (CAPF) ha khappud bad ka Bangladesh bad ka jinglut na ka bynta kane kan long T.70 klur.
Ka jingthmu jong kane ka long ban pynbiang ia ki lad pathai khubor na ka bynta jong ki paidbah kiba don ha ki thain khappud kiba don jingeh mynta ban ioh ia phone. Ban leh ia kane don kam 56 tylli ki tower ban shna ha shilynter ka khappud jong ka jylla Meghalaya bad ka Bangladesh.
La iathuh ba ka sorkar Meghalaya kala pan haduh 75 tylli ki Digital satellite phone Terminal (DSPT) kum ka jingpynkhreh ioh shu don kano kano ka jingshah pynjulor ha ka Mariang, na kitei kiba la pan da ka sorkar Meghalaya bad na kitei ki 75 tylli ka BSNL kala dep ai 44 tylli bad ia kiba dang sah 31 tylli yn sa leh noh shen kala ong.
Ia kine ki DSPT la dep ban buh ha baroh ki ophis jong ki Deputy Commissioner ha kane ka jylla, bad ha ki katto katne tylli ki Block, ka jingthmu jong ka sorkar ka long ban buh ha baroh ki ophis jong ki Block ban suk ha kaba phah khubor na kawei ka jaka sha kawei ka jaka lada don kano kano ka jingshah pynjulor ha ka mariang. Ka General Manager kala kubur ba ka don ka jingthut ha ka liang jong ka BSNL, hynrei mynta kin sa shna 51 tylli ki tower ha baroh kawei ka jylla bad kane kan sa pynbha ia ki mobile network kiba dei jong ka BSNL.
Kane ka ophisar kala ong shai bad ki company shimet kin ialeh tang ha ki jaka ba don ka jingioh nong hynrei na ka liang jong ka BSNL ka long ban pynioh ia ki telephone sha baroh ki shnong ha kane ka jylla Meghalaya namar ka BSNL ka trei na ka bynta ban kyntiew ia ka roi ka par jong ka Ri Baroh kawei.(SP News Agency).