Kwah jingkhein ka BJP, ia ka MLA skhim

Bah Monarch Shabong

Hap ai jing iaroh ia U President jong ka seng BJP, jong ka Jylla, ha kaba ula kren rangbah ha kine ki sngi bad kata ka long ba u kwah ban ioh jingkhein, ba kumno ki MLA ka Jylla, ki pynlut ia ka pisa kaba T.25lak, kaba dei ka pisa, ba la mang na ka bynta ban sam khaw sha u paidlang baduk ka Jylla.

Katei ka pyni, ba U President jong ka seng heh, kum ka BJP, u don ia ka bor bad ka sur kaba khlain, ha kaba u lah ban dawa ia ka sorkar lane ia u myntri rangbah ka jylla, ba un jubab ia ka mat, kaba u sngew donkam bad katei lehse, kam pat jia ha kiwei pat ki seng jong kane ka sorkar synrop MDA, ba U President jong ka NPP, UDP, BJP, PDF, kin nud ban ang ia ka shyntur, kumba ong utei u heh BJP.

Ka jing dawa jong u heh duh ka BJP, ba ka sorkar Jylla, kan wad ia ka jingkhein kaba bniah, halor ka jing pynlut jong ki MLA ia katei ka pisa kaba T.25lak sha kawei kawei ka Constituency, ka long kaba sngew iahap shi katdei, namar ba katei ka dei ka pisa, kaba la mang, na ka bynta ban iarap ia ki lanot jong ka khlam covid bad kumta, lada ki MLA, ki buh rieh noh halade ia ka pisa, lane ki leit thied noh da kiwei pat ki tiar, kan long kaba beain bad ka sorkar Jylla, ka dei ban sei madan ia kitei ki jingleh.

Kam dei hi tang katta, kan jin da la bha ia utei u heh BJP, ba un dawa ym tang ia kane ka T.25 lak, hynrei dei ban dawa ia ka T.2.5 klur, namar ba ka la dei ka pisa kaba bun, ba ka dei ban wan, da ka jingkhein kaba biang bad kaba shai bad ba U Accountant General jong ka Meghalaya ruh, u dei ban da tih bniah ia ka jingkhein jingdiah, namar ba katei kam dei ka pisa jong uno uno U MLA, hynrei ka dei ka pisa kaba ki la tangon na ki paidbah, ha ki rukom bapher.

Katei ka mat jingdawa ia ka jingkhein kaba biang, kam dei ban kut, da kaba shu pyllait jynhaw tang shisien, hynrei ngi khmih lynti, ba utei u khlieh duh jong ka seng BJP, ba un buddien bad ba un sei madan ruh, lada don kino kino ki MLA, (khlem da riej ia ki jong la jong ne kiba don ha ka liang synshar ruh), kiba pyn kylla skhim bai dawai, ne skhim thied blanket na katei ka pisa.

Kam kut tang katta, hynrei hangne ruh ka pyn shai kdar pleng ha khmat jong u paidbah, ba ka bor jong U President ka seng BJP, ka ia ryngkat lane (imat) ka kham heh pynban, (ba u lah ban hukum) wat ia u myntri rangbah ka Jylla.