Kwah iaphylliew jingmut ka MCPCR bad u CEM Ba pyndonkam bakla ki Rangbah shnong ia la ka bor

Shillong, 21 Nohprah:
Ka Chairperson ka Meghalaya Commission for Protection of Child Rights (MCPCR) ka Kong Meena Kharkongor ka la ong ba ka Komishon ka kwah ban iakren iaphylliew jingmut bad u CEM ka KHADC Bah Adelbert Nongrum, ban iakren halor ka jing pyn donkam bakla jong ki Rangbah Shnong, ia la ka bor.
Ka kong Kharko ngor ka kwah ban iakyn duh ia u Bah Nongrum hadien ba ka la don ka jingjia ha kaba ki dkhot ka dorbar shnong ka Umiuh Tmar kaba don sharum Pynursla ki la donkti ban shoh ban dat ia uwei u khynnah halor ka jingkynnoh ba u dei u nongsyntiat ia ki BSF bad ki khar Bangla.
“Kane ka dei ka jingjia kaba ma. Ka KHADC ka dei ban shim ia ki lad ki lynti ban pynsngewthuh ban hikai ia ki khlieh nongsynshaer ba kim bit ban pyndonkam bakla ia la ka bor”, la ong ka chairperson ka MCPCR.
Ka la ong ba ki Rangbah Shnong lane u Sordar kim lah ban shim ia ka ain ha la ka kti kumba la paw ha kine ki sngi, ki don bun ki shnong ha kaba u rangbah shnong ne sordar ki leh pyrshah da kaba shim ia ka ain ha la ka kti.
“Ngin ban jur ia ka Council ban pynshitom ia ki nongsynshar shnong kiba pyndonkam bakla ia ka bor”, la ong ka Kong Kharkongor.
Shwa ia kane, u CEM ka KHADC u la maham ia ki nongsynshar shnong ba kim dei ban pyndonkam bakla ia la ka bor kaba pynkhein ia ka hok longbriew manbriew.