Shillong, 14 Nailar:
Ka seng lehnoh ka Hynniewtrep National Liberation Council (HNLC) ka la pynpaw ba ka kwah ban iakren ia ka sorkar, lada ka shim khia shisha ia kane ka kam kaba la sahteng la slem.
Ha kine ki 26 snem kaba long ha kane ka sngi Balang ka 14 tarik Nailar, ka HNLC ka la ong ba ka jingkhang jongka seng ban iakren bad ka sorkar ka plie lada ka sngewkhia shisha ban iakren ban pynbeit ia ki jingeh.
Ia ka seng HNLC la seng ha 14 tarik u Nailar, jong u snem 1987.
U general secretary ka HNLC u Bah Chesterfield Thangkhiew u la ong ha ka kyrwoh ba la pynlait ha kane ka sngi Balang, ba ka jingkhang jong ka seng ka plie rynghang lada ka sorkar ka sngewkhia shisha ban iakren bad ka seng ban iapynbeit ia ki jingeh lyngba ka miej.
U Bah Cheristerfield u la ong ba ka HNLC ka kwah ban iakren tang lada ka sorkar ka kiar noh ban buh shwa ia ki kyndon namar ba ka seng ka kwah ban iakren khlem kano kano ka kyndon. Ha kajuh ka por, u la pynpaw ia ka jingsngew bynniaw ba ka sorkar ka shu saham tang na shyntur ba kwah iakren hynrei kam leh satia kumba ka dei ban long ban shim khia ban iakren ia ka kam kaba la sahteng slem.
“Ka sorkar ka shu pynlut kai ia ka por namar ba ka thngan bor bad spah palat bad kim iohi ei ei ba kan shim khia ba kwah shisha ban iakren”, la ong u Chesterfield.
U la kyntu ruh ia ki paidbah ka ri Khasi bad Jaintia ban ym long niangkohnguh ha ka sorkar bad ki politishian.
Ha kajuh ka por, ka sngi 15tarik Nailar 2013, ka dei ka sngi ka ban sah kynmaw pateng pakit, ba ka dei ka sngi, kaba ka HNLC, kam shym la khot ia ka pakhang shnong, kaba dei ka prokram, kaba katei ka seng, ka la ju leh man la u snem, ha ka sngi rakhe sngi laitluid bad ka sngi rakhe republic jong ka sorkar India.
Lah ban pynkynmaw, ba dang ha ka 26tarik Kyllalyngkot 2013, ka HNLC, ka dang shu khot pakhang shnong. Ki pakhang shnong sngi laitluid bad sngi republic, ki dei kiba la khot da katei ka seng, naduh ba dang seng ia katei ka seng, ha u snem 1987, kaba la long la 26snem eiei.
Phi don ban ong eiei?