Kwah elekshon noh ka Elaka Nongjngi

Jowai, 24 Nailar:
Ka Dorbar Elaka Nongjngi, West Jaintia Hills District, ha ka jingialang (Executive Committee), kaba la long ha ka 20tarik Nailar 2014, ka la pynpaw ka jingsngew diaw kaba jur ia ka Jaintia Hills Autonomous District Council (JHADC), halor ka jingpynsangeh kynsan jong ka ia jingiajied thep vote (Election) Doloi kaba la buh ban long ha kane 19tarik Nailar 2014, kaba la pynsangeh ia kane ka election khlem kano kano ka jingpyntip shwa sha ki paid jong ka Elaka.
Ha ka kyrwoh ba la ai da u publicity secretary Dorbar Elaka, bah Moonlight Daw, u la ong ba hadien ba ka JHADC, ka la pynsangeh ia ka elekshon jied Dolloi ha ka Elaka, na ka liang jong ka Elaka kaba la iakynduh ruh ia u CEM ka JHADC ma T.Shiwat u la ong ba hapoh shiphew sngi ka High Court kan sa khot (Summon) ia baroh ar liang mamla ki parti. Khnang ban pynbeit ia kane ka kam, kat kum ka hukum jong ka kashari bad ka shithi No.JHADC/POL/9/2014/53, kaba la ai da ka Jaintia District Council, kaba ki la ioh katkum ka hukum jong ka High Court of Meghalaya Shillong WP (c) No.272 of 2014 Dt 18.08.2014, lyngba ka Deputy Secretary, Executive Committee & Returning Officer, Doloiship Election, Jaintia Hills Autonomous District Council, Jowai.
Ha ka jingiadei bad kane ka kam, ka Dorbar Elaka Nongjngi ka kyntu jur ia u CEM ba un pyndep kloi katba lah, hapoh kitei ki shiphew sngi ia kane ka kam jied Doloi, lem kumta ka Dorbar kan iaid da kawei pat ka lynti kaba kham tyngeh, pynkut ka kyrwoh.